Empresariado e comunidades de montes exixen á Xunta recuperar a Axencia Forestal

A extinción da Axencia Galega da Industria Forestal (XERA) -organismo que botou a andar en 2017-, anunciada o pasado 24 de marzo a través do Diario Oficial da Galiza (DOG), causou malestar e desconcerto nese importante sector do país. O Goberno galego explicaba a decisión como unha “reorganización” dentro do seu Executivo, apuntando que pasaría a depender da Secretaría Xeral de Industria e Desenvolvemento Enerxético. Esta novidade sumábase ao tamén polémico cambio á fronte da Consellaría de Medio Rural ao afirmar a nova titular, María José Gómez Rodríguez, que os incendios van no ADN galego. As primeiras reaccións á eliminación da Axencia Galega da Industria Forestal viñeron desde o propio sector. A Asociación Forestal da Galiza aseguraba “non entender unha decisión que, en principio, supón un gran paso atrás para o sector”, e no colectivo de empresas de primeira transformación, Lugomadeira, lamentaba que non fora consultara ao respecto. Pola súa parte, a Federación Empresarial de Aserradores e Rematantes de Madeiras da Galiza (Fearmaga) e o Clúster da madeira do deseño da Galiza solicitaban saber cal sería a estratexia do Goberno galego a partir de agora. Ambas as dúas entidades, xunto á Asociación Provincial Empresarios de Primeira Transformación da Madeira en Lugo, selaran en outubro de 2023 coa Consellaría de Medio Rural o plan estratéxico da industria forestal-madeira, cun investimento de 150.000 euros, a través da XERA. "Estase a promover un monte cada vez máis combustíbel”: a FEG critica a suspensión do Consello Forestal Galego Á espera de información Desde a Federación Empresarial de Aserradores e Rematantes de Madeiras da Galiza (Fearmaga), o seu presidente, Elier Ojea Ureña, lamenta en declaracións a Nós Diario a extinción do organismo. "Mentres estivo funcionando colaboramos na medida das nosas posibilidades", admite, "e serviu para mellorar algúns dos temas que nos preocupaban no sector", engade. Ojea indica que eles foron unha das entidades que formularon a idea "de contar cun interlocutor que atendese aos diferentes subsectores que traballamos a madeira" e estaban "satisfeitos" do seu funcionamento. Entre os proxectos máis atractivos para Fearmaga estaba o anuncio da Consellaría de Medio Rural no seu momento, de impulsar a construción pública en madeira, unha proposta que buscaba, segundo aseguraban, "animar" á iniciativa privada. Nós Diario contactou tamén onte co Clúster, que rexeitou facer declaracións "até manter unha xuntanza coas Consellarías". Ambas as dúas entidades sinalaron que desde a Xunta só lles confirmaron que a semana vindeira tiñan axendadas reunións nas Consellarías de Medio Rural e Industria. Os usos forestais Desde a Organización Galega de Comunidades de Montes Veciñais en Man Común (Orgaccmm), o seu presidente, Xosé Alfredo Pereira, considera, en declaracións a Nós Diario, que a decisión de Alfonso Rueda de extinguir a XERA que funcionaba en Medio Rural “pode ser polémica". Explica esta opinión remitíndose ao inicio da mesma nesta Consellaría. "Dá marcha atrás e volve a Industria un organismo que no seu momento accedeu a mudar polas peticións do sector forestal”, sinala. A instalación de Altri en Palas de Rei facilita un cártel no sector forestal Os montes veciñais seguen sen ter presenza nestes foros e o diálogo é nulo. Neste sentido, Pereira bota en falta “máis transparencia” e ter coñecemento de “se haberá cambios tamén con respecto á política de montes na Galiza”. En relación ao percurso estes anos da XERA, admite que "fixo un bo traballo e agora quédanos a dúbida de se a intención, con este cambio [a creación dun organismo semellante pero dependente da Consellaría de Industria], é que a industria pase a asentarse nos montes". Neste caso, Pereira alerta de que en breve entren nos montes galegos "todos os usos non forestais". Rexistro de carbono Unha iniciativa que estaba sendo liderada por XERA e que se esperaba para este ano era o Rexistro galego de carbono. Na Galiza estase a comercializar xa neste momento carbono forestal dentro do Rexistro estatal, mais o Goberno galego optou por considerar crear unha regulación alternativa, na que teñan acollida outros proxectos. Nese novo Rexistro, a proposta é incluír a capacidade de secuestro de carbono dos solos agrícolas e da madeira estrutural empregada na construción. Tamén de masas arboradas que se traballen a través de métodos como é o caso da silvicultura. Na Orgaccmm preocupa moito este tema polas consecuencias que tería a nivel económico se non se leva adiante pensando nas propietarias e nos propietarios dos montes. “Se a proposta que tiña Medio Rural era aumentar o negocio a terceiros, moito temo que agora que se fala de que se traslada a Industria aínda sexa peor”, opina Pereira, “cando o normal para nós é que sexa un recurso máis dos montes veciñais onde os principais beneficiarios deberían ser sempre os seus titulares”. Está na madeira autóctona o futuro da industria do moble? A decisión afasta as propietarias do uso do monte A eliminación da Axencia Galega da Industria Forestal (XERA) da Consellaría de Medio Rural terá, en opinión do presidente da Organización Galega de Comunidades de Montes Veciñais en Man Común (Orgaccmm), Xosé Alfredo Pereira, consecuencias para as propietarias e os propietarios de montes na Galiza. "Agora os titulares xa non estaremos presentes nalgúns órganos consultivos", asegura. Ademais, lembra que "se continuase na actual Consellaría teriamos presenza nalgúns organismos, aínda que non directamente na Axencia, si estariamos no Consello Forestal". "Mesma política" na Consellaría O presidente da Orgaccmm recoñece que desde a súa entidade non valoran os cambios que houbo nas Consellarías, nomeadamente na de Medio Rural. Porén, considera que "continúa o mesmo goberno do Partido Popular polo que as políticas que faga a nova conselleira cremos que serán as mesmas". En todo caso indica que "poden cambiar as fórmulas e, neste caso, será máis positivo se temos en conta que non terá moi complicado superar ao anterior responsábel" que, para Pereira, "era totalmente xordo ás demandas das comunidades de montes".