O prezo da vivenda en aluguer na Galiza baixou 1,2% na súa variación mensual e subiu 6,4% en evolución interanual, o que situou o seu prezo en 8,46 euros por metro cadrado no mes en agosto, segundo os datos do Índice Inmobiliario Fotocasa.
No conxunto estatal, o prezo da vivenda en aluguer situouse en 11,34 euros por metro cadrado no mes de agosto, cifra 4,7% superior á do mesmo mes de 2022, pero 2,2% inferior ao do mes anterior, co que xa encadea catro meses consecutivos de descensos.
"Durante o mes de agosto, o prezo do aluguer a nivel estatal segue mostrando unha leve tendencia cara á moderación do crecemento tras mostrar as variacións máis significativas da súa historia nos pasados meses", afirmou a directora de Estudos e portavoz de Fotocasa, María Matos.
Con todo, Matos advertiu de que o prezo medio a nivel estatal "non mostra a realidade das comunidades máis tensionadas, que continúan con crecementos moi avultados a pesar da temporada estival". De feito, segundo Fotocasa, 16 cidades do Estado volveron marcar récord de prezos en agosto.
A demanda
"A demanda está a se retardar nas zonas onde habitualmente a demanda é menos intensa, pero segue dinámica e forte nas cidades que atraen cada vez a máis poboación, o que ocasiona incrementos de dous díxitos no arrendamento", explicou Matos.
Segundo Fotocasa, tres territorios do Estado superaron en agosto os prezos máximos do aluguer por metro cadrado ao mes. As zonas cos máximos prezos de toda a serie histórica son Euskadi (15,06 euros/m2 ao mes), Asturias (9,11 euros/m2 ao mes) e A Rioxa (8,90 euros/m2 ao mes).
As vivendas máis caras para alugar están en Balears e Madrid (17,01 euros/m2 ao mes e 16,90 euros/m2 ao mes, respectivamente); Catalunya (15,88 euros/m2 ao mes), Euskadi (15,06 euros/m2 ao mes), Canarias (12,83 euros/m2 ao mes), Cantabria (12,39 euros/m2 ao mes), País Valencià (11,40 euros/m2 ao mes) e Nafarroa (10,93 euros/m2 ao mes).
