Pontevedra acolle as propostas máis actuais "contra o crecemento infinito"

A cidade de Pontevedra volve ser este ano a capital mundial das novas propostas económicas e sociais que cuestionan o actual modelo de crecemento. Desde a pasada terza feira e até esta sexta feira, máis de 1.200 persoas procedentes do mundo académico, do activismo e tamén do político, reúnense na cidade do Lérez para avaliar e dar a coñecer propostas ante o sistema crecentista actual. O evento fai coincidir, por segunda vez, a décimo quinta Conferencia da Sociedade Europea de Economía Ecolóxica (ESEE) coa décima Conferencia Internacional de Decrecemento. En ambas as dúas, segundo a organización, presentáronse perto de 950 estudos sobre economía ecolóxica e informes relacionados co movemento do decrecemento. Este encontro ten lugar coincidindo coas protestas e mobilizacións que se veñen desenvolvendo estes meses contra a macroplanta de celulosa da empresa portuguesa Altri na Ulloa, un modelo de desenvolvemento económico extractivista. O desafío do evento foi, polo tanto, tentar conectar as propostas do decrecemento coa cidadanía e as súas institucións. O director do grupo Post-growth Innovation Lab da Universidade de Vigo (UVigo) e profesor do programa Oportunius GAIN-Xunta da Galiza, Mario Pansera, explica a Nós Diario que a importancia destas xornadas “transcende o propio debate que se realice aquí”. Argumenta que, ademais da presenza de importantes figuras do ámbito académico e investigador, “están presentes todas as formacións políticas, agás o PP, que rexeitou a invitación, e de maneira especial destaca a participación do representante da Comisión Europea, Hans-Christian Eberl”, como exemplo do interese por afondar en novas propostas económicas. Deste último, Pansera salienta o seu interese por contar cunha economía circular “que desafíe o paradigma do crecemento infinito", unha afirmación que pon en evidencia "que nesa Europa está aberto ese debate no tratamento da transición ecolóxica". Pontevedra será o epicentro da economía ecolóxica durante o mes de xuño Dereito a reparar Na xornada desta quinta feira debateuse sobre a economía circular e a Directiva que promove a reparación de bens rotos ou defectuosos, tamén denominada Directiva sobre o Dereito para Reparar, acordada provisionalmente este mesmo ano polo Consello e mais o Parlamento Europeo. A lexislación acordada fará que para as consumidoras e os consumidores sexa máis fácil tratar de reparar un produto que substituílo, ao aumentar a facilidade, rapidez e transparencia do acceso aos servizos de reparación, así como o seu atractivo. Entre as relatoras interveu a investigadora da Universitat Autònoma de Barcelona (UAB), Blanca Callén. "Agora mesmo a lei está moi centrada nas consumidoras e consumidores, mais estase deixando de lado que igual a cuestión é que deberiamos consumir menos", apunta Callén a Nós Diario, "é unha lóxica ecolóxica, estanse acabando os recursos naturais e mesmo reciclar require moita enerxía", agrega. A súa proposta é ir máis alá e "priorizar dunha maneira moito máis seria o decrecentismo a nivel económico". Neste sentido, cre que "non podemos deixar en mans do mercado unicamente a resposta ao dereito a reparar, pola posibilidade de que as compañías vexan na reparación un ámbito secundario do que tamén sacar proveito", conclúe esta investigadora da UAB. Primeiro congreso sobre decrecemento en Ferrol Alternativas e clima Na xornada desta sexta feira terán lugar as dúas últimas sesións plenarias, que proporán visións alternativas da idea de innovación e conectarán cambio climático e decrecemento. Na primeira intervirán Adrian Smith, Andrea Jiménez e Alejandra Boni, das universidades de Sussex, Sheffield e Politécnica de Valencia, respectivamente, mentres que a segunda conversa contará coa intervención do director do servizo climático do programa europeo Copernicus, Carlo Buontempo, xunto con Pansera e Julia Steinberger, da Universidade de Lausanne. Alejandra Boni adianta a Nós Diario que, no seu caso, conta con tratar algunhas alternativas "desde un punto de vista de políticas públicas de innovación, en particular a partir da transformación". O exemplo que dará a coñecer en Pontevedra é o do municipio catalán de Alcarràs e outros da súa contorna, que traballan no ámbito da bioeconomía. "É unha zona de interior, moi rural, con problemas de desemprego, emigración do campo á cidade e pequenos produtores que teñen problemas para subsistir", indica Boni, "polo que crearon no territorio unha planta que transforma os residuos noutros produtos con valor engadido", aclara. A ciencia non é neutral "Ante todo hai que ter en conta que a ciencia e a tecnoloxía non son en absoluto neutrais", asegura Mario Pansera. Este investigador considera, polo tanto, que non se poden disociar estes ámbitos "dos seus propios creadores, hai neles un forte compoñente político". Por outra parte, entende que a idea de que a ciencia "pode resolver todos os problemas causados polo capitalismo é mentira", polo que precisa "de medidas políticas contundentes". Pansera pon, na base do que se tratou nestas xornadas, a idea de que "a ciencia ten que estar ao servizo do pobo e de maneira democrática". Para que se visualice esta idea o evento prescindiu de fecharse en si mesmo e contou con "abrirse, colocar os diferentes elementos de debate nun espazo mixto, para que o político teña diante o social e tamén o académico". O decrecemento peta nas portas do Parlamento galego Da música de Abe Rábade ás propostas de estudantes de Pontevedra Na programación destas conferencias, coa idea de expandir o resultado dos debates e os relatorios, tamén se organizaron diferentes actividades. Unha delas foi o Espazo Xove, a proposta que fixo que estudantes de cinco institutos da cidade do Lérez presentaran os resultados das investigacións sobre o futuro de Pontevedra que desenvolveron no marco do proxecto Postgrowth SA. Ademais, o evento destes días aumentou a súa visibilidade na cidade con máis de vinte actividades. Un exemplo foi a actuación do pianista Abe Rábade no programa social, centrado no seu proxecto Botánica, precedido á súa vez da conversa pública nas xornadas que o músico mantivo co economista grego Giorgios Kallis e coa investigadora do Post-Growth Innovation Lab, Sofia Greaves.