A nai das xemelgas absolve o fillo do presidente luso, imputado por abuso de poder por suposta mediación para que as trataran nun hospital

Daniela Martins, nai das xemelgas luso-brasileiras que foron tratadas nun hospital de Lisboa cunha medicación de dous millóns de euros, presuntamente coa mediación do Goberno luso e do fillo do presidente, Marcelo Rebelo de Sousa, e en paralelo á obtención da nacionalidade portuguesa, ofreceu o seu testemuño a sexta feira na comisión de investigación parlamentaria que estuda o denominado “caso xemelgas” pola prensa local.

Poucos días despois de confirmarse que o fillo do mandatario, Nuno Rebelo de Sousa, fora imputado co ex secretario de Estado de Sanidade António Lacerda, nun caso que a Fiscalía investiga por prevaricación e abuso de poder, Martins asegurou que non coñece Nuno e que só coñeceu a súa parella despois do tratamento.

Nese punto, ao serlle presentado un correo electrónico que lle enviara á parella con anterioridade sostivo que non lembra se foi ela ou outra persoa quen o escribiu. Á vez, xustificou unhas declaracións nas que afirmaba que recibira axuda do presidente aducindo que “foi o que entendín do que ouvín no hospital”.