Prisciliano volve á vida no chantadés Pazo de Sabadelle

Ao nordeste do concello de Chantada encóntrase unha parroquia franqueada ao seu leste polo río Miño, chea de historia e na cal se fai moi bo viño. Trátase de Sabadelle, un lugar destacado pola súa beleza natural e por ser a terra en que se erixe o famoso Pazo de Sabadelle. Construído previsibelmente no século XIII, as pedras deste pazo emiten historia e cultura. Historia por todo o que leva vivido e cultura polo que vive na actualidade. O Pazo de Sabadelle é o escenario de múltiples exposicións, actuacións e actos culturais de diversa índole que dan vida a esta parroquia do interior do país. Por alí teñen pasado grandes expoñentes da cultura galega e doutras culturas para admirar os séculos de historia con que conta a edificación. Xosé Figueroa Lorenzana é o actual dono do pazo e o artífice de que toda a cultura que se encontra nel teña alí un fogar. A última exposición que nestes momentos acolle o pazo leva por título 'Mater Haereses. Prisciliano da Gallaecia' e trata da figura de Prisciliano, un personaxe cuxa historia é tremendamente interesante. Naceu no ano 340 e pasou á historia por ser un verdadeiro adiantado ao seu tempo, xa que en pleno século IV defende a igualdade entre mulleres e homes respecto á participación activa nos templos, predica a abstinencia de alcol e carne, non prohibe o matrimonio de monxes e clérigos, condena a escravitude, utiliza a danza como parte da liturxia, acepta o uso dalgúns evanxeos apócrifos -non autorizados pola Igrexa- como o de San Tomé e propugna a eliminación da xerarquía eclesiástica. Non é de estrañar, pois, que a Igrexa daquela altura o condenara por 'herexe'. Foi no ano 380. Aser Álvarez leva ao cinema o camiño de Prisciliano Pasou cinco anos tentando evitar a pena capital, redactando tratados para defender as súas doutrinas e tentando entrevistarse co Papa. Finalmente, no ano 385 os bispos Magno e Rufo conseguen levalo ante o concilio de Tréveris (cidade da actual Alemaña) onde o emperador romano naquel momento, Magno Clemente Máximo, decretou a súa execución por bruxaría e herexía mediante decapitación segundo a tradición, guindado da Porta Nigra, xunto con catro dos seus discípulos. As súas doutrinas aínda son estudadas e os seus seguidores cóntanse por millares aínda hoxe. Prisciliano en Chantada O dono do Pazo de Sabadelle, Xosé Figueroa, atende Nós Diario para tratar a figura de Prisciliano e a exposición que até o 30 de setembro se poderá ver nesta parroquia chantadesa. "Aquí sempre tentamos facer diversas actividades relacionadas coa historia deste país, neste caso pareceunos que a figura de Prisciliano é especialmente importante, emocionante mesmo. Con todo, nós non somos especialistas na súa figura, somos xente que simplemente tentamos transmitir a outras persoas as emocións que certas figuras relacionadas con este país nos transmitiron a nós", salienta Figueroa. Sobre a historia do propio Prisciliano, o dono do Pazo de Sabadelle indica que "é impresionante, un personaxe realmente curioso. Un home que no século IV estaba a favor da igualdade entre mulleres e homes ou que estaba a favor da abolición da escravitude, iso significaba ir en contra do poder estabelecido por completo. Só por iso xa é unha persoa que ben merece ser estudada e lembrada". Prisciliano foi un cristián achegado á súa xente e as súas ideas e maneira de ver a relixión aínda perduran até a actualidade. A este respecto, Figueroa manifesta que "Prisciliano utilizaba os elementos achegados á xente nas súas vidas como fontes, pedras ou ríos e dáballes un sentido especial para que formasen parte dun conxunto, dun todo, no cal tamén se insería o cristianismo. E esta idea aínda perdura hoxe en día. Galiza é un país moi priscilianista". O inicio da exposición O pasado mes de xuño tivo lugar a presentación da exposición. Foi un acto que contou cunha nutrida asistencia de público e no cal se puideron ver por vez primeira as diferentes pezas expostas así como gozar de música ao vivo. As dúas vidas do monxe galego Baquiario Acerca deste acto de presentación, Figueroa indica que "na exposición queremos mostrar pezas que teñan algunha relación co mundo do priscilianismo. Así, entre as persoas que achegaron obras á exposición están o fotógrafo Anxo Cabada, que retrata nas súas tomas persoas a través da forza natural. No tocante á pintura, aceptou o noso convite Xabier Correa Corredoira, un pintor da xeración atlántica que ten unhas cualidades incríbeis que se achegan moito ao que queremos transmitir coa exposición dedicada a Prisciliano". No relativo á música que se puido escoitar ao vivo en Sabadelle, estiveron presentes artistas como Catuxa Salom ou o grupo chantadés As Searas. O futuro do pazo Para alén desta exposición concreta, no Pazo de Sabadelle tamén hai espazo para todo tipo de actividades culturais como as que Figueroa vén desenvolvendo desde hai anos. Un grande impulso á cultura propia que dá vida ás aldeas do interior do país. Acerca do futuro do pazo, Figueroa asegura que "podemos esperar deste pazo todo aquilo que se lle ocorra á xente. O que buscamos é promover este país, xa sexan personaxes ou algún feito relevante. Mentres nos encaixe na promoción da historia e cultura galegas aquí terá sempre un espazo". "Temos na cabeza unha chea de posibilidades que non podo desvelar xa que máis ben son ideas que aínda están por materializar ou por perfilar. Pero é que hai moito que reivindicar na Galiza e moitas persoas e profesións que honrar, desde poetas e literatos até xornalistas e políticos pasando por xeógrafos e músicos", engade Figueroa. "Nós ao final somos unha aldea, e o noso traballo é crear unha especie de oasis para seguir vivindo neste mundo tan complicado", conclúe o dono do Pazo de Sabadelle. E é que a reivindicación do rural e da maneira galega de vivir está no cerne da maior parte das actividades que se levan a cabo alí. Cunha combinación de todo a historia que entre esas paredes de pedra se viviu e a actualidade de moitas das obras que alí se expoñen, o de Sabadelle é un pazo que ben vale a pena visitar. Un oasis de cultura no interior do país O Pazo de Sabadelle é un lugar cheo de cultura os 365 día do ano. Unhas paredes que transmiten historia xúntanse en Sabadelle coa actualidade das actuacións e das obras que alí se expoñen. Un verdadeiro oasis que é posíbel grazas a Xosé Figueroa Lorenzana, actual dono do pazo e artífice de que unha parroquia do interior da Galiza sexa epicentro dun verdadeiro sismo cultural que sempre ten como intención a promoción do país. "Hai moito por reivindicar", asegura Figueroa e é que mentres haxa forza, Sabadelle seguirá sendo a capital da cultura na aldea.