A eurodeputada do BNG e vicepresidenta do Intergrupo do Sáhara Occidental da Eurocámara, Ana Miranda, así como a deputada nacionalista no Parlamento galego, Montse Prado, están a participar no XVI Congreso da Fronte Polisario que ten lugar na “Wilaya de Dajla", o campamento de refuxiados saharauís en Alxeria.
“É fundamental a nosa presencia neste congreso histórico, xa que se trata dun evento de grande importancia para a causa saharauí por ser o primeiro que decorre desde 2019 e desde a volta á guerra nun contexto internacional e de reconfiguración xeopolítica”, explicou Miranda, quen interveu na sexta feira na apertura do Congreso da Polisario amosando o apoio á loita e resistencia do Pobo do Sáhara Occidental.
Pola súa parte, a deputada Montse Prado, membro da Executiva Nacional do Bloque e integrante do Intergrupo do Sáhara Occidental no Parlamento Galego, mostrou "o total respaldo do BNG ao Pobo Saharauí, a loita polos dereitos humanos e pola independencia do Sáhara Occidental".
“Existen varios temas de actualidade no desenvolvemento da política internacional, como son a presión exercida na Eurocámara en contra do Pobo Saharauí, que agora sae á luz a raíz do Qatargate e que xa se coñece como Moroccogate”, sinalou Miranda, quen subliñou que "aínda que este caso de corrupción foi feito público agora", o BNG na Eurocámara "leva tempo denunciando a presión marroquí cando constantemente se boicoteaban resolucións no Parlamento Europeo de apoio ao Pobo Saharauí".
“Temos que denunciar que o lobbie marroquí foi sempre moi incisivo e contou co consentimento da Unión Europea (UE)”, manifestou a eurodeputada nacionalista, quen explicou que esa presión tamén é feita “nas sucesivas e terríbeis denuncias sobre as persoas defensoras dos dereitos humanos”.
Neste sentido, lembrou os casos de Aminatu Haidar, -que en 2005 foi encarcerada e torturada polo réxime marroquí- e de Sultana Khaya -que en 2021 foi encerrada por Marrocos na súa casa durante máis de 100 días- así como "os prisioneiros políticos saharauís e a opresión que Marrocos exerce na poboación dos territorios ocupados".
Soberanía e autodeterminación
A eurodeputada do BNG considerou "fundamental" a defensa da soberanía do Sáhara Occidental e do seu dereito a autodeterminación así como a recuperación do control sobre os seus propios recursos naturais.
”Os recursos naturais, enerxéticos, agrarios e pesqueiros do Pobo Saharauí foron e seguen sendo espoliados e esquilmados pola ocupación ilegal de Marrocos coa conivencia das potencias da UE”, denunciou a eurodeputada nacionalista, quen defendeu o dereito dos saharauís a xestionar estes recursos.
Desta forma, Miranda lembrou que a Corte de Xustiza da UE emitiu o ano pasado unha sentenza histórica que declaraba ilegais os acordos comerciais e de pesca da UE con Marrocos porque non contan co apoio e consentimento do Pobo Saharauí, representado polo seu lexítimo representante político, a Frente Polisario.
“Esperamos e desexamos que a inminente sentenza definitiva por parte do Tribunal de Xustiza da UE sexa favorábel ao Pobo Saharauí”, salientou, ao tempo que denunciou o “inaceptábel cambio de postura do Goberno español, aceptando as presións da ditadura marroquí”.