O BNG solicitou ao Goberno español prorrogar as diferentes rebaixas fiscais sobre a factura da luz que se puxeron en marcha por mor da guerra en Ucraína e que caducan o 31 de decembro, así como instaurar unha tarifa eléctrica especial para Galiza por ser un territorio "excedentario" de enerxía.
Nunha batería de preguntas escritas no Congreso, o deputado do BNG, Néstor Rego, advertiu de que a finalización das diferentes rebaixas fiscais "preocupa os consumidores, especialmente as maiorías sociais e colectivos vulnerábeis".
Entre as axudas impulsadas en diferentes decretos inclúese unha rebaixa temporal de 5% do IVE da factura da luz ou a redución do imposto especial da electricidade, que pasou de 5,1% a 0,5%.
Encarecemento significativo
De finalizar estes apoios, a formación nacionalista calcula que a factura dos consumidores podería experimentar un "encarecemento significativo", en concreto de 7 euros máis en cada factura, independentemente da tarifa contratada, for mercado libre ou tarifa regulada.
Por todo iso, Rego pregunta ao Executivo español se vai prorrogar de novo estas medidas e se mesmo considera facelas definitivas e aplicar permanentemente á luz e ao resto de subministracións básicas do fogar o IVE superreducido de 4% destinado aos bens esenciais.
Ademais, tamén se interesa o deputado nacionalista pola eliminación de determinados cargos e peaxes da factura eléctrica e sobre se se vai a acometer unha reforma "estrutural" do mercado eléctrico, onde caberían fórmulas como eliminar o mercado almacenista, nacionalizar ou crear empresas públicas de enerxía.
Adicionalmente, o BNG pregunta por un posíbel imposto sobre os beneficios de grandes empresas enerxéticas.