A portavoz nacional do BNG, Ana Pontón, fixo esta cuarta feira un chamamento a mobilizarse o próximo 17 de maio na manifestación que impulsa a plataforma Queremos Galego baixo a lema 'Galego vivo, Galiza viva', fronte ás "políticas desgaleguizadoras" do PP e o "torpedeo" que atribuíu ao Goberno que preside Alfonso Rueda.
En rolda de prensa após reunirse co portavoz da entidade, Marcos Maceira, Pontón volveu pór o foco na petición de "derrogar o decreto da vergoña", en referencia ao denominado 'decreto de plurilingüismo' impulsado polo primeiro goberno de Alberto Núñez Feixoo após a participación do agora mandatario galego participou nunha manifestación que convocara Galicia Bilingüe.
Pontón incidiu nos datos que arroxan a situación da lingua, con alumnos con dificultades para "expresarse" en galego cando terminan a etapa escolar —un de cada tres non o domina—, polo que unha das reclamacións do BNG é, precisamente, que se "derrogue ese tan cacareado decreto do plurilingüismo" que, ao final, "torpedea" o uso do idioma galego.
Así, Pontón dixo que o próximo 17 de maio os galegos e galegas teñen unha ocasión para mostrar nas rúas "ese orgullo en defensa do idioma" e de reclamar "mil primaveras máis para a lingua" propia, así como "un cambio de rumbo ás políticas do PP". Pontón defendeu que o galego ten que estar "en todos os ámbitos da sociedade: no comercio, a xustiza, no funcionamento da administración... onde a discriminación é evidente".
Ademais, e nun contexto preelectoral europeo, indicou que tamén no programa electoral para as eleccións do 9 de xuño, o BNG levará dous compromisos co idioma: a reclamación de que se cumpra a Carta Europea das Linguas Rexionais e Minoritarias e a reclamación, en coherencia co anterior, para que sexa recoñecida en todas as institucións, despois dese paso dado no Congreso sobre o que volveu considerar unha "mágoa" que o PP e Rueda "non o apoiasen".
Un idioma "vivo grazas á cidadanía"
Pola súa parte, Marcos Maceira reivindicou que se o galego "está vivo" é grazas á sociedade, aos funcionarios de xustiza que o usan, á cidadanía, alumnos, profesores... "Poderiamos seguir así en todos os ámbitos da sociedade, porque a sociedade garante que existe", defendeu Maceira, quen dixo que é preciso "acompañamento do goberno" a esa cidadanía e que "nos e poñan obstáculos" para desenvolver unha vida no idioma propio.
Na súa comparecencia, tamén lamentou a falta de "vontade" do Goberno galego, ao que lle solicitou, en concreto ao conselleiro do ramo, José López Campos, un encontro, e de quen só tiveron como resposta "o silencio".
