As persoas falecidas entre as usuarias vulnerábeis das estradas galegas aumentaron un 20% en 2023, segundo datos achegados polo delegado do Goberno español na Galiza, Pedro Branco, con motivo da reunión da Comisión Autonómica de Tráfico e Seguridade Viaria. En concreto, supuxeron un 36% das vítimas mortais nas estradas galegas.
O delegado do Goberno español na Galiza chamou á atención sobre os falecidos entre motoristas, ciclistas e peóns, que cada vez teñen un peso maior nas estatísticas de vítimas. Esta tendencia á alza iniciouse en 2020 e o ano pasado chegou a 32 persoas falecidas destes colectivos.
Respecto ao balance anual de 2023, Pedro Branco destacou o descenso das vítimas nas estradas da Galiza, consolidando a tendencia que marcaron os primeiros meses do ano. En total producíronse 88 vítimas nun total de 88 accidentes de tráfico mortais.
"Atender as provincias, a baixada máis acusada produciuse na da Coruña, cun 40% menos de persoas falecidas". "Pola contra, Ourense sumou 10 falecidos máis que no ano anterior nas súas estradas", explicou, alertando do exceso de velocidade e a velocidade inadecuada.
Tamén o subdelegado do Goberno español en Ourense, Emilio González, alertou sobre a importancia da prevención nun control da campaña da Dirección Xeral de Tráfico. En particular, incidiu en que as estradas convencionais son as vías onde máis sinistros se producen. "O obxectivo desta campaña é reducir a velocidade media" para o que, dixo, contarase co apoio das policías locais "para conseguir un maior alcance tamén nas estradas urbanas".
