A Audiencia Nacional confirmou a absolución da ex cúpula da xa extinta Caixanova, entre eles o seu presidente Julio Fernández Gayoso, por unha serie de operacións crediticias coa promotora Promalar entre 2005 e 2010.
A Sala de Apelacións da Audiencia Nacional desestima así o recurso presentado pola Avogacía do Estado en nome do Fondo de Reestruturación Bancaria (FROB), ao que se adheriron a Fiscalía e Abanca, contra a absolución ditada o pasado 13 de xullo pola Sección Primeira da Audiencia.
A causa
Na causa estudábanse, entre outros, un préstamo hipotecario de 60 millóns e unha póliza de crédito doutros 60 millóns para a promotora en 2005, outro préstamo hipotecario de 9,7 millóns en 2007 e unha póliza de crédito de 5 millóns en 2009.
Esa primeira resolución que foi ratificada acordou absolver dos delitos de administración desleal e apropiación indebida os dez acusados, entre eles Gayoso, os ex directores xerais de Caixanova, Gregorio Gorriarán e José Luis Pego, así como o administrador de Promalar SL, Juan Lago Pérez.
Administración desleal e apropiación indebida
Sobre o primeiro dos delitos, o de administración desleal, o tribunal mantén que está prescrito porque a pesar de que foron até cinco operacións bancarias entre 2005 e 2010 hai "unidade delituosa" e, por tanto, a posíbel prescrición debe analizarse de "maneira conxunta".
En canto ao delito de apropiación indebida, a Sala confirma o que xa recollía a sentenza, que "non hai proba exteriorizada da existencia dun plan preconcibido urdido entre os acusados da alta Dirección de Caixanova e a da construtora Promalar SL para conseguir diñeiro no seu beneficio".
