Os pacientes hospitalizados pola Covid-19 na Galiza aumentan a 381, que supón 39 máis nas últimas 48 horas -a Xunta xa non actualiza os datos os domingos e festivos-, mentres que os casos activos descenden a 19.462 -453 menos que o sábado-, tras outro milleiro de novos contaxios. Pola súa banda, a taxa de positividade redúcese a 8%.
Segundo os datos actualizados esta segunda feira pola Consellaría de Sanidade, con rexistros até as 18 horas do domingo, recollidos por Europa Press, aumentan a 27 as persoas ingresadas en UCI pola Covid-19 -unha máis que o sábado- e a 354 as hospitalizadas en unidades convencionais -38 máis que hai 48 horas-, mentres que 19.081 pacientes permanecen en seguimento no seu domicilio. Hai unha semana -7 de marzo- había 431 ingresados -34 deles en UCI-.
Por áreas sanitarias, a presión hospitalaria aumenta en todas agás na da Coruña e Cee, na que aínda que soben a oito os pacientes Covid en UCI -un máis-, baixan a 72 os ingresados noutras unidades -tres menos que o sábado-. Polo seu lado, a de Lugo segue sen pacientes Covid en UCI, pero rexistra 38 en tras unidades -12 máis que o sábado-, mentres que a de Santiago e Barbanza mantense con sete en críticos e concentra 60 noutras unidades -dez máis-.
No caso da de Ourense, continúan seis persoas ingresadas pola Covid-19 en UCI, mais aumentan a 64 as doutras unidades -nove máis-; mentres que na de Vigo segue un paciente en críticos e soben a 41 os doutras unidades -cinco máis-. Na área de Ferrol descenden a dúas os pacientes Covid en UCI --un menos-- e aumentan a 35 os doutras unidades --tres máis--, mentres que na de Pontevedra e O Salnés soben a tres o críticos --un máis-- e a 44 os hospitalizados noutras unidades --dous máis--.
En canto aos casos activos, fréase a tendencia ascendente do cinco días anteriores -até o sábado-, ao baixar a 19.462, que constitúen 453 menos que os rexistrados hai 48 horas, ao haber máis altas (2.920) que contaxios (2.469), ao que se engaden dous falecementos.
As infeccións activas ascenden en dúas do sete áreas sanitarias desde o sábado: Ferrol (+110) e A Coruña-Cee (+24); mentres que descenden nas outras cinco, coa de Vigo á cabeza (-221), Santiago-Barbanza (-122), Pontevedra-O Salnés (-119), Ourense (-63) e Lugo (-59).
En canto á taxa de positividade -número de PCR positivas por cada 100 realizadas- descendeu no inicio desta semana até 8,33%. Deste modo, segue por riba de 5% que marca a OMS para dar por controlada a pandemia.
Pola súa banda, as persoas falecidas pola Covid-19 desde o inicio desta pandemia ascenden a 3.153 despois de notificar esta segunda feira a Consellaría de Sanidade outros dous mortos.
