A Organización Mundial da Saúde (OMS) pide non utilizar palabras como 'deltacrón' ou 'flurona' para falar da Covid-19 pola "inexactitude" destes termos en relación á pandemia.
Así o pon de manifesto a doutora Maria Van Kerkhove, epidemióloga líder da OMS, a través do seu perfil en Twitter, onde sinala que eses conceptos "implican combinación de virus ou de variantes, e isto non está a ocorrer".
"Non usemos palabras como deltacrón, flurona ou flurone. Por favor. Estas palabras implican unha combinación de virus ou variantes e isto non está a suceder. É probábel que deltacrón sexa unha contaminación durante a secuenciación, porque o SARS-CoV-2 continúa evolucionando", manifestou.
A respecto do concepto de flurona, que fai alusión á combinación de Covid e gripe, a experta vaticinou que se producirán máis casos de coinfección "debido ao uso limitado de medidas sociais e de saúde pública".
Por iso, instou a continuar coa vacinación de ambas as enfermidades e a seguir tomando medidas de prevención como o uso da máscara, manter a distancia, evitar lugares concorridos e ventilar as habitacións.
Na mesma liña apuntan expertos como o virólogo Tom Peacock, do Imperial College de Londres: "As secuencias de deltacrón chipriotas, das que informaron varios medios de comunicación, semellan estar claramente contaminadas: non se agrupan nunha árbore filoxenética".
Por outra parte, o virólogo Raúl Ortiz de Lejarazu, ex director do Centro Nacional de Gripe do Hospital de Valladolid, cualifica de "parvada" o concepto de flurona: "A coinfección non é algo novidoso, senón que vén de varias décadas atrás. Non é unha nova enfermidade, nin un novo virus, nin unha nova variante, e tampouco é máis grave, agás excepcións. Que non vendan motos nin asusten", afirma, a través de Twitter.