Este 2024 vai camiño igualar e mesmo de superar a marca de varadas do ano pasado. A media anual desde que Cemma iniciou a súa actividade en 1992 é de 270, "pero en 2023 rexistráronse moitas máis, 618 varadas de cetáceos", dos cales só 10% estaban vivos.
Entre os exemplares mortos, que sempre analizan antes da súa incineración, destacan os de golfiño común e os arroaces. Só no primeiro semestre do ano rexistráronse na Galiza máis arroaces mortos (21) que a media anual das últimas tres décadas (17). Esta semana apareceu un arroaz no Grove, a varada número 500 na Galiza no que vai de ano.
O biólogo de Cemma Pablo Covelo manifestaba a Nós Diario o pasado mes de agosto que "sempre chegan tartarugas, pero este ano máis, mesmo se deixan ver cara ao fondo do Golfo de Biscaia, onde é moi raro ver animais vivos".
Segundo explicaba entó Pablo Covelo, 90% das tartarugas proceden do outro lado do Atlántico e 10% da zona de Cabo Verde. Son grandes migradoras que arriban moi novas, "con dous ou tres anos e non máis de 30 centímetros de coiraza, que pode alcanzar un metro na idade adulta". Son "moi duras", di o biólogo, unha resiliencia que lles permite sortear as adversidades.
A Coordinadora para o Estudo dos Mamíferos Mariños, Cemma, fixo 30 anos en 2022 30. Tres décadas de estudo e divulgación dos mamíferos e das tartarugas mariñas da Galiza que deron comezo no inicio da década dos 90 do século pasado arredor dun esqueleto de balea azul na Universidade de Santiago.
O proxecto comezou a desenvolverse no ámbito do Museo de Historia Natural Luís Iglesias da USC, mais acabou por consolidarse dous anos despois, en 1992, como unha asociación autónoma, independente de calquera outra institución.
Estudo e divulgación
Desde 1999 Cemma é a entidade responsábel da asistencia a todos os exemplares varados na costa galega, da xestión do banco de mostras destas especies, da recuperación dos animais feridos e do seu estudo poboacional. Participa, ademais, na redacción dos plans de conservación das especies máis ameazadas para a administración galega e estatal.
En tres décadas, Cemma asistiu 7.416 exemplares mariños encallados nos areais galegos. "É unha das vivencias que máis impacto e repercusión social ten. Son especies pouco frecuentes e chaman a atención. Atendelas e devolvelas ao seu medio require da participación cidadá e do sector do mar", apuntaba naquela altura a Nós Diario o biólogo da Cemma Alfredo López, quen salienta o aproveitamento que fan destas experiencias para facer educación ambiental.
