Alumado de 3º da ESO poderá cursar na Galiza unha materia optativa, "pioneira" sobre cultura financeira, que pretende dotar mozos de 14-15 anos de "ferramentas adecuadas", segundo a Xunta, para "o emprendemento".
O conselleiro de Cultura, Educación, FP e Universidade, Román Rodríguez, destacou que "supón dar resposta a unha serie de demandas", debido a que, desde a perspectiva do Goberno de Alfonso Rueda, "a educación non é un fin, é un medio", e por iso é polo que busque "dar oportunidades" e "preparar para o futuro" o alumnado.
Pensada para 3º da ESO e a partir do próximo curso, esta materia explicará conceptos como tipo de interese, prima de risco, hipoteca e déficit, segundo enumerou o conselleiro, quen apuntou tamén a saber "como se fai unha nómina".
Até o de agora "non existe unha oferta educativa perfectamente regrada" sobre estes asuntos, aínda que "moitos" deles están contidos no currículo.
Neste sentido, reivindicou que, "deseñada dando resposta" aos ditados da OCDE, é "a primeira -materia- en España" e ensinará cuestións como "o que se pode facer e non facer" e dará contido para saber "xulgar condutas" no ámbito financeiro, sobre transaccións e estafas, entre outros aspectos.
Banco de España
Nesta liña, o director do departamento de Conduta de Entidades do Banco de España, Fernando Tejada, fixo fincapé na relevancia do "empoderamento", en consonancia co labor de regulación e supervisión da institución á que se debe.
Coa finalidade de incrementar o "benestar" e a "saúde" económicos, valorou esta materia como unha "ferramenta".
Contido
Con tres sesións de horario por semana, os contidos da materia distribuiranse en catro bloques temáticos: sobre diñeiro e transaccións, planificación e orzamentos, xestión bancaria das finanzas persoais e educación ao consumidor.
Entre outras cuestións, cultura financeira abordará as obrigas fiscais da cidadanía, os riscos cibernéticos, as criptomoedas e o aforro.