É posíbel que unha vacina evite 100% de infeccións por Covid?

A elevada porcentaxe de vacinación na Galiza non está a impedir un constante aumento dos contaxios da Covid-19, dado que, insisten as persoas expertas, as vacinas actuais non cortan a transmisión vírica, senón que reducen notabelmente as probabilidades de desenvolver un cadro sintomático agudo que deriva en hospitalización ou, nos peores casos, na morte.

Porén, a comunidade científica xa está a artellar o que se denomina como 'vacina definitiva', isto é, un fármaco que protexa contra a infección e a transmisión do coronavirus. Neste proxecto está a traballar o Centro Superior de Investigacións Científicas (CSIC) desde que principiou a pandemia. Mais o composto non se administraría por vía intravenosa, senón por vía intranasal, que é a técnica que permite ofrecer unha resposta inmune fronte á Covid-19.

A OMS aposta nas vacinas de segunda xeración

Pola súa parte, directora do departamento de Inmunización, Vacinas e Produtos Biolóxicos da Organización Mundial da Saúde (OMS), Kate O'Brien, non confía en que nalgún momento se desenvolva unha vacina contra a Covid-19 que produza inmunidade esterilizante, isto é, que evite todas as infeccións polo novo coronavirus. "Non creo que debamos ter a expectativa de que haxa algunha vacina que proporcione inmunidade esterilizante. É unha tarefa moi difícil para unha vacina", sinalou O'Brien durante unha sesión informativa decorrida esta segunda feira no marco da 150ª reunión do Consello Executivo da OMS.

Sexa como for, a experta si apuntou que as xeracións vindeiras de vacinas contra a Covid-19 poderían mellorar, por moito, as actuais. "Creo que podemos ter unha expectativa de que as vacinas terán un mellor rendemento contra a infección e, por tanto, contra a transmisión, mais realmente teremos que ver o que as vacinas poden facer", esgrimiu.

Da mesma forma, considera que poderían axudar non só á loita contra a Covid-19, senón contra outros coronavirus en xeral. "Os beneficios potenciais dunha vacina de segunda xeración poderían ser non só con respecto a esta pandemia en particular, senón un conxunto máis amplo de competencias para esas vacinas", detallou.

O director executivo do Programa de Emerxencias da OMS, Mike Ryan, lembrou que as vacinas actuais se desenvolverán "para protexer contra a enfermidade grave, a hospitalización e a morte". "Nese senso, estas vacinas teñen un rendemento excelente. Cambiaron as regras do xogo, mais todas e todos quereriamos unha vacina que dese inmunidade esterilizante durante un período prolongado, que fose eficaz contra múltiples variantes, etc. Ese é realmente o 'unicornio' que todos buscamos, o reto das vacinas de segunda e terceira xeración", expresou.

De cara ao futuro, Ryan si considera que se poderían administrar diferentes vacinas en función da idade ou do risco fronte á Covid-19. "Eu diría que cando falamos de dose de reforzo agora, dentro de seis meses ou un ano podemos estar a falar de diferentes cursos primarios para grupos de risco, e do número de doses necesarias para provocar unha resposta protectora a longo prazo", remachou.