Hassanna Aalia, activista sahariano condenado por un tribunal militar marroquí a cadea perpetua, estará esta quinta feira en Compostela nun acto organizado por Galiza Nova. Será ás 20.30 horas na Facultade de Filosofía.
Aalia dará conta da situación que atinxe o pobo sahariano nos territorios ocupados e nos campamentos para persoas refuxiadas localizados no deserto. Porén, tamén abordará a realidade na que el propio se atopa após solicitar asilo político no Estado español e serlle rexeitado.
Hassanna Aalia solicitou asilo político no Estado español, foille denegado, agora agarda que a Audiencia Nacional resolva o recurso
Hassanna Aalia foi procesado pola xustiza militar marroquí en 2011 no marco do campamento de Gdeim Izik, unha protesta contra a ocupación do Sáhara e polo dereito de autodeterminación do pobo saharaui. Xulgado en rebeldía e condenado a cadea perpetua, Aalia solicitou asilo político ao Estado español, unha demanda que lle foi rexeitada e contra a que presentou recurso perante a Audiencia Nacional. Actualmente agarda a que o seu caso sexa resolto.
Aproveitando unha visita anterior a Galiza Sermos Galiza conversou con el nunha entrevista na que asegurou "para España os intereses económicos con Marrocos están por riba dos dereitos humanos".