Máis de 40 persoas testificarán no xuízo polo crime de Samuel Luiz, o mozo de 24 anos que faleceu na madrugada do 3 de xullo de 2021 após recibir unha malleira no paseo marítimo de Coruña. Así o informou o Tribunal Superior de Xustiza de Galiza (TSXG) ao detallar como se realizará e a súa duración.
Será entre o 16 de outubro e o 18 de novembro na Audiencia Provincial da Coruña, segundo comunicou xa con anterioridade a maxistrada presidenta nun auto. Aos membros do xurado popular, cuxa selección realizarase o día 15, exporánselle 87 cuestións ás que deberán dar resposta.
A elas, súmanse outras sete sobre o grao de execución do delito e a participación dos cinco acusados. Outros dous menores no momento dos feitos xa foron condenados.
O xuízo, con sesións que comezarán ás 9:45 horas e que se celebrarán, durante ese período, todos os días, de segunda a sexta feira, en horario de mañá, comezará cos informes e cuestións previas o día 16.
O 17 de outubro declararán dous dos cinco acusados, A.M.R. e C.S.B, a única muller que sentará no banco dos procesados. O inicio das testificais será tamén ese día con dous amigos da vítima presentes no lugar e os cidadáns senegaleses que trataron de auxiliar a Samuel.
Logo continuará o xuízo con testificais e outras probas até que o 14 de novembro teña lugar a declaración dos tres acusados que optaron por facelo ao final: D.M.M., A.F.G e K.A.S.C. O día 15 de novembro terá lugar a lectura dos informes finais con posibilidade de tomar a última palabra os acusados e logo comezará o proceso para o veredicto.
O xurado popular decidirá se os feitos descritos constitúen un delito de asasinato, como sosteñen as acusacións, ademais dun posíbel delito de roubo con violencia pola presunta subtracción do móbil da vítima que se atribuíu na investigación a un dos acusados.
En canto ás circunstancias agravantes, deberá determinar se dous dos acusados (D.M.M. e C.S.B.) executaron os feitos relatados "por causa da súa animadversión cara á orientación sexual homosexual que lle atribuíron á vítima", recolle o auto da maxistrada.
E é que no seu caso, xunto ao delito de asasinato con aleivosía e asañamento que se pide para todos - a un dos procesados súmaselle tamén o delito de roubo do móbil de Samuel-, impútaselles a agravante de discriminación por condición sexual.
Xunto ás defensas, no xuízo están personadas a familia e a acusación popular, exercida polo colectivo LGTBI Alas A Coruña, ademais de Fiscalía, que solicita 25 anos de prisión para os dous primeiros procesados e 22 anos para os outros tres por delito de asasinato. Para un dos acusados, solicita tamén cinco anos de prisión polo delito de roubo con violencia, polo que para el as penas suman 27 anos de cárcere.
Como circunstancias eximentes e/o atenuantes, a maxistrada presidenta sinalou no seu auto que ha de establecerse, a través das probas presentadas na vista, se tres dos procesados, debido á previa inxesta de bebidas alcohólicas ou de drogas, atopábanse en estado de intoxicación, dando lugar "a algunha situación de alteración, diminución ou eliminación da súa capacidade para formar a súa vontade e comprender o alcance dos seus actos".
