Tamén aumentou o número de mulleres vítimas, pois entre o 1 de abril e o 30 de xuño de 2020 contabilizáronse 1.493, fronte ás 1.636 deste ano nas mesmas datas, o que supón unha alza do 9,6%.
A taxa de violencia de xénero (vítimas por cada 10.000 mulleres) situouse na Galiza en 11,7, por baixo da media estatal, que foi do 16,6.
Así se desprende dos datos do Observatorio contra a Violencia Doméstica e de Xénero publicados polo Consello Xeral do Poder Xudicial (CXPX) e dos que informou esta sexta feira o Tribunal Superior de Xustiza da Galiza (TSXG).
Segundo este estudo, a gran maioría das denuncias rexistradas na Galiza (1.384) chegaron aos xulgados a través de atestados policiais con denuncia da vítima.
Incidencia da Covid na Xustiza
O TSXG sinala que para analizar os datos hai que ter en conta a incidencia da Covid-19 na Administración de Xustiza, sobre todo no período analizado, o máis afectado pola declaración do estado de alarma.
De feito, apunta que se a comparativa se realizase co segundo trimestre de 2019, as cifras situaríanse en niveis similares. O ano previo á pandemia, entre abril e xuño, presentáronse 1.607 denuncias, un 2,6% menos que este ano, e contabilizáronse 1.545 vítimas, un 6% menos.
As sentenzas cuadriplicáronse
Así mesmo, o número de sentenzas ditadas no segundo trimestre deste ano cuadriplicou o do mesmo período de 2020. Os distintos órganos xudiciais (xulgados de violencia sobre a muller, xulgados do penal e audiencias provinciais) ditaron 606 sentencias ente abril e xuño de 2021, un 286% máis que no segundo trimestre de 2020, cando se ditaron 157. O 77,5% do total dos fallos foron condenatorios.
Conforme aos datos estatísticos publicados polo CXPX, na Galiza mantéñense os casos de vítimas que se acollen a non declarar. No segundo trimestre de 2021 optaron por esta opción 108 mulleres, o 6,5% das vítimas, practicamente as mesmas que en 2020, cando o fixeron 104.
Ordes de protección
Durante o segundo trimestre deste ano, ademais, solicitáronse ante os xulgados de violencia sobre a muller e os xulgados de garda 633 ordes de protección, case as mesmas que hai un ano, cando se denunciaron 617.
Delas, foron acordadas 434 (o 68,5%), un 8% máis que no mesmo trimestre de 2020. Desas 633 ordes de protección, 525 foron solicitadas ante os xulgados de violencia sobre a muller. No 41,8% dos casos, mantiveran anteriormente unha relación afectiva co agresor (o seu cónxuxe ou parella) no momento de solicitar a orde de protección.
Ademais, entre abril e xuño de 2021, os xulgados de menores axuizaron unha persoa por delitos relacionados con violencia sobre a muller. O ano pasado, no mesmo período foron xulgados tres menores.
