A “superlúa da colleita” as mareas vivas de setembro e o equinocio están a provocar preamares e baixamares inéditas nas últimas dúas décadas na Galiza. O espectáculo comezou na cuarta feira, con superlúas enormes e brillantes, tinguidas estes días de vermello por mor dos incendios de Portugal.
A coincidencia do Sol e a Lúa no ecuador, os cero graos e o momento de maior achegamento da lúa á terra é a orixe de moitos dos fenómenos que estamos a ver por todo o país. A preamar e baixamar desta quinta feira e desta cuarta feira deixaron imaxes inusuais de praias anegadas até quedar sen areal e lugares case ao descuberto na baixamar coma o Náutico de Vigo e moitos puntos da costa da Morte.
As baixamares máis espectaculares da costa galega víronse na cuarta feira ás 23.28 horas da noite. Esta quinta feira ás 11.42 da mañá o nivel do mar na costa galega voltou a ter o seu momento álxido por efecto da lúa chea. No caso das preamares están a ser, segundo os datos rexistrados as máis altas dos últimos 19 anos.
Esta quinta feira alcanzouse medio metro por riba do pico habitual do mes de setembro (4 metros). Na ría de Foz (A Mariña) a preamar chegou esta quinta feira aos 4,6 metros, en Ferrol e A Coruña tivo 4,4 metros, e 4,3 na Costa da Morte e nas Rías Baixas 4,2 metros.
Limpeza na ría
A presidenta da asociación de mariscadoras a pé de Carril (Vilagarcía, no Salnés), María Porto, está a ser testemuña deste fenómeno en primeira persoa e desde a praia. “Son unhas mareas espectaculares”, explicou a Nós Diario, “baixou tanto o mar que aproveitamos para limpar a fondo, sementar e mover o terreo”. Recoñece Porto que estas mareas “fanse longas e duras” pero ao mesmo tempo “son moi boas para coller o produto en zonas habitualmente inaccesíbeis”.
