O presidente da Xunta da Galiza, Alfonso Rueda, augurou un novo récord anual de peregrinos e peregrinas para este 2024 e estimou que este mesmo mes de xuño xa se alcanzará a cifra de 200.000 compostelas emitidas.
Rueda, que durante estes días realiza varias etapas do Camiño Portugués da Costa, destacou este sábado o peso que ten o peregrino internacional na ruta xacobea, que xa supera 60% da cifra total, e valorou que as e os visitantes opten cada vez máis por rutas máis diversificadas e desestacionalizadas.
"Está a conseguirse que a 'Marca Galiza', algo que é fundamental para nós, para o noso turismo, para representar Galiza no mundo, teña mellor saúde que nunca", afirmou o presidente galego desde Pontevedra, onde iniciou a etapa deste sábado.
Aliás, o presidente da Xunta quixo animar a vivir "toda unha experiencia" como é facer algún dos camiños de Santiago e destacou que tanto o Camiño portugués tradicional como o Portugués da Costa "xa están case á par do francés" en número de peregrinos e peregrinas.
A peregrina número 100.000 chegou á capital galega neste 2024 da forma máis temperá na historia, un 13 de maio. En concreto, trátase dunha muller peruana de 60 anos, Milagros Miní Bailey, residente en Florida (Estados Unidos), que fixo co seu marido o roteiro portugués pola costa desde Porto.
O Camiño xa conseguira en 2023 o seu máximo histórico de peregrinos, con máis de 446.000 Compostelas outorgadas ao longo do ano. Unha cifra que continúa á alza no que vai de 2024, xa que o ano pasado o dato dos 100.000 camiñantes alcanzouse un 22 de maio, pero agora adiántase en nove días.