As persoas desempregadas que leven seis meses cobrando a prestación do paro percibirán desde esta sexta feira unha media de 100 euros máis ao mes, correspondente á mensualidade de xaneiro.
Este aumento das retribucións das persoas que cobran a prestación por desemprego chega tras a entrada en vigor en 2023 da alza a 60% da base reguladora para calcular a prestación a partir do sétimo mes.
Segundo afirmou a vicepresidenta segunda do Estado español e ministra de Traballo, Yolanda Díaz, déixanse atrás "os recortes que inflixiu o PP", que baixou a 50% a base reguladora para calcular a prestación por desemprego a partir dos primeiros 180 días.
"Hoxe -por esta sexta feira- as persoas en desemprego verán aumentada en 100 euros de media a súa prestación. Recuperamos dereitos fronte aos recortes que inflixiu o PP. Volve ser efectiva a base reguladora de 60%, e non de 50%, a partir do sétimo mes de cobranza", escribiu Díaz no seu perfil da rede social Twitter.
Revértese o recorte do PP
O Ministerio español de Traballo e Economía Social recuperou nos Orzamentos Xerais do Estado (OXE) de 2023 a prestación por desemprego equivalente a 60% da base reguladora, reducida a 50%, a partir dos 180 días durante o Goberno do ex presidente español Mariano Raxoi (PP).
Con este cambio, as persoas desempregadas recibirán 100 euros máis de media, até obter unha prestación próxima a 1.000 euros mensuais, a partir do sétimo mes de cobranza.
O pasado novembro, Díaz defendeu ante o Congreso estatal que esta medida permitirá manter o seu poder adquisitivo "fronte a unha inflación que é autenticamente imposíbel".
O desenvolso das prestacións de desemprego por parte do Servizo Público de Emprego Estatal (SEPE) prodúcese entre os días 10 e 15 do mes seguinte, ou se é feriado, o próximo día hábil.
