Antía Chamosa: "Formar parte dun equipo no que te sentes cómoda é marabilloso a todos os niveis"

—Vés de gañar, xunto coas túas compañeiras, o bronce no mundial de marcha por equipos. Como sabe esta vitoria? Estamos moi contentas. Teño que recoñecer que eu non estaba segura de que puidésemos conseguilo. Na listaxe de inscritas, estabamos de cuartas e dependiamos dos resultados de todas nós e do resto de competidoras. Unha das miñas compañeiras díxome que confiase, que tiña a intuición de que iamos facelo moi ben, e así foi. Despois, celebrámolo con moito entusiasmo. —Traballas ben en equipo? É moi bonito medrar deportivamente xunto ás miñas compañeiras. Gañar probas individuais está moi ben a nivel de experiencias e crecemento persoal, mais no futuro as competicións que vas lembrar son as que compartiches con outras persoas. Formar parte dun equipo no que te sentes cómoda é marabilloso a todos os niveis. —As deportistas non só competides contra as vosas rivais, senón tamén contra as vosas propias marcas. Como xestionas esa presión autoimposta? Lévoo relativamente ben. O atletismo é un deporte que exixe moita constancia, ás veces o sacrificio non dá os seus froitos, normalmente os resultados non chegan de xeito inmediato. Non me gusta presionarme, cando consigo realizar unha proba ou unha marca boa celebro esa satisfacción no momento, pero non me obsesiono con bater ese récord. O atletismo é un deporte que exixe moita constancia —Despois de preparar as tempadas, ás veces aparecen lesións que impiden chegar ás competicións. Es unha persoa resiliente? Si, o máis importante é a constancia. A comezos de ano, sufrín tendinite e tiven que reducir a miña actividade física. Cando aparece unha lesión, é bastante difícil lidar coa falta de motivación, pero é importante seguir todas as recomendacións médicas para sandar. —Algunhas das figuras máis transcendentes da elite deportiva galega son naturais de Pontevedra, como é o teu caso. Que ten este concello para exportar tanto talento? Pontevedra é a cidade, o seu propio deseño urbano convida a practicar deporte. Eu adestrei noutros territorios do Estado e podo dicir que é moito máis cómoda respecto a outras urbes. Ademais, a disciplina da marcha exixe unhas condicións orográficas moi concretas, non se pode adestrar en calquera sitio. É necesario atopar unha superficie chá que non presente ningún tipo de pendente, e en Pontevedra sempre puiden realizar satisfactoriamente o meu adestramento. —En Europa, o fútbol é o deporte por excelencia. Que papel cres que desempeñan os medios de comunicación na promoción doutras disciplinas como o atletismo? Considero que é moi importante a forma de construír o relato. Moitas veces vexo probas de marcha que non suscitan ningún tipo de interese pola forma de retransmitir esta disciplina desde os medios de comunicación deportivos cara ao público. Creo que se poderían estudar fórmulas alternativas de narrar as competicións. Por outra parte, tamén é necesario que se aplique maior pedagoxía. Ás veces, a xente non comprende como funcionan as faltas na marcha. Entón pódese dicir que existen dúas funcións relevantes: informar e promover.