Gharaboto brilla na Liga Atlántica de Billarda

O Pavillón de Nantes, en Sanxenxo, acolleu a undécima xornada da Liga Atlántica de Billarda na súa Conferencia Rías Baixas, destacando Álvaro (Gharaboto de Marín), que foi o gran triunfador da xornada, seguido polo seu compañeiro de equipo Ricardo Lois e por Albino Veiga (Valpaços Terra Quente de Vigo), que completou o podio na categoría absoluta. No referente á feminina, a mellor foi Ainhoa (Armadiña de Combarro), rematando na segunda posición Lu (Lúa de Forza de Sanxenxo) e na terceira Tania (Valpaços Terra Quente). Pola súa parte, na infantil o -case sempre- intratábel Xián volveu gañar, concluíndo por diante de Sofía e Antía, ambas competidoras dun Gharaboto que levou o premio na categoría colectiva, mentres que segundo foi o local Lúa de Forza.