A Liga Galega de Sendeirismo botará a andar en febreiro
03 de xaneiro de 2024 (15:52 h.)
As diferentes competicións nacionais van oficializando os seus calendarios de cara ao recentemente inaugurado ano 2024, sendo unha delas a Liga Galega de Sendeirismo, que nesta ocasión botará a andar o próximo día 25 de febreiro. A confirmación chegou da man da Federación Galega de Montaña (FGM), que revelou que a V Andaiana de Noia, de 25 quilómetros, será a primeira proba das 14 que conformarán o circuíto. Marín, Guláns-Ponteareias, As Neves, Padrón, Entrimo, Brión, Porto do Son, o Barbanza, Ribeira, A Rúa, Pereiro de Aguiar e O Barco son as localidades e comarcas que acollerán os distintos eventos, baixando o pano en Valdeorras o 9 de novembro.