O medio maratón regresa ás rúas de Vilagarcía

As rúas de Vilagarcía de Arousa volverán acoller o domingo 26 de novembro a Media Maratón Concello de Vilagarcía, un evento que non se disputaba desde o ano 2019, antes da irrupción da pandemia da Covid-19. O certame regresa á capital arousá ao grande, xa que adquirirá tamén a condición de Campionato Galego de Media Maratón. Con respecto á aceptación dos e das atletas, nun acto de presentación que tivo lugar no día de onte o presidente da Federación Galega de Atletismo, Iván Villar, confirmou que a falta dunha semana para o feche do prazo de inscrición xa hai 400 persoas anotadas, mostrando o seu optimismo de cara a que se alcance o límite dos 500 dorsais.