Un tiroteo nun instituto de secundaria do Estado de Iowa deixa varias persoas feridas

Varias persoas resultaron feridas esta quinta feira nun tiroteo rexistrado nun instituto da cidade de Perry, no estado de Iowa, segundo informou a Policía estadounidense, que sinalou que o atacante morreu tras autoinflinxirse un disparo. O incidente tivo lugar no Instituto Perry, que retomaba esta quinta as aulas após as vacacións de Nadal, cando unha persoa irrompeu no centro escolar e abriu fogo. As primeiras chamadas alertando do sucedido rexistráronse sobre as 7.30 horas (hora local), segundo informacións da cadea de televisión ABC. As autoridades do condado de Dallas, que non revelaron polo momento información sobre o atacante, indicaron que as persoas feridas foron trasladadas a un hospital da zona, sen que até o momento se coñeza a magnitude das feridas.