O río Conso, das Hedradas a Pradoalbar e máis alá

En Vilariño de Conso, o río que lle dá nome ao concello, que ten as fontes máis afastadas nas abas do monte do Seixo, na serra de Queixa, e vai desaugar ao encoro do Vao e ao Bibei, recolle augas dos altos das serras que pechan o parque do Invernadoiro e escoan por paredes case verticais, creadas polo desprazamento dos xeos que cubrían o Macizo Central en tempos pasados, nas que forman longas fervenzas. Paraxe: LIC/ZEC Macizo Central | Concello: Vilariño de Conso | Percorrido: 8 quilómetros por estrada + 3 quilómetros a pé á ponte de Pradoalbar (lineal) | Dificultade: Baixa A estrada que vai da Gudiña a Vilariño de Conso transita pola liña de cumes cara ao encoro das Portas, e logo vira á dereita para baixar e achegarse á presa e ao río Camba, un pouco por debaixo dela —a máis alta da Galiza. Logo volve subir para saír do val á altura de Entrecinsa, onde chegamos a un cruzamento que pola dereita nos leva a Vilariño de Conso e pola esquerda á Hedrada e a Pradoalbar, os lugares da nosa visita. Desde Vilariño, ademais de por Entrecinsa, tamén se pode vir pola estrada que sobe á fervenza do Cenza, que, despois de cruzar o río, segue até a Hedrada. O percorrido é lineal e pola beira da estrada, un pouquiño máis longo en coche que a pé, porque camiñando podemos ir á Hedrada e atallar logo para subir á estrada un pouco adiante. En coche hai que ir á Hedrada e volver ao cruzamento para ir logo a Pradoalbar. Un pouco antes de cruzar o río temos á esquerda a primeira fervenza, que forman os regos das Gorbias e de Reboredo. Ao cruzalo desviámonos á esquerda para ir á Hedrada, pasando pola beira do encoro homónimo, e temos, tamén á esquerda, a segunda fervenza, a do rego da Louseira que cae no encoro. Mesmo na Hedrada, á entrada do lugar, temos as fervenzas do rego da Suafraga. Volvemos atrás e, sen cruzar a ponte, seguimos para chegar uns 300 metros máis adiante ao cruzamento que, pola esquerda, nos leva a Pradoalbar, desde onde se repiten as vistas. A uns 2,5 quilómetros pasamos o lugar de San Mamede da Edrada e un pouco despois, á esquerda, temos outra fervenza, a do rego da Cenza. Desde aquí hai uns 4 quilómetros longos para chegar a Pradoalbar, onde se xuntan os regos cabeceira do Conso. Na localidade, seguindo o rego da esquerda, que desde aquí ao nacemento chaman da Cerveira, temos outra pequena fervenza en dous saltos. Se fixemos o percorrido en coche, podemos camiñar un pouco e seguir remontando o río da Cerveira polo camiño que hai por enriba dos prados até chegar, 3 quilómetros alá, á vella ponte romana, que viu e viviu o paso da xente ao longo de centos de anos.