Para amantes do 'western'

Primeira incursión de Paul Greengrass no xénero western. O director da saga de Jason Bourne, United 93 ou Capitán Phillips pon acougo á realización "marca da casa", á que nos ten acostumados, suavizando os movementos de cámara a fin de se achegar un clasicismo de reminiscencias fordianas nesta adaptación do libro homónimo da novelista e poetisa Paulette Jiles. Noticias do gran mundo (News of the World) / Paul Greengrass / EUA / 2020 / 118 min. O capitán Kidd (Tom Hanks) é un veterano da guerra civil estadounidense que gaña a vida lendo os xornais por diferentes cidades e vilas. Un día topa con Johanna (Helena Zengel), unha nena duns dez anos que foi secuestrada pola tribo Kiowa cando apenas sabía falar. Johanna quere volver cos indios, a única familia que coñece, mais o capitán Kidd debe levala xunto os seus verdadeiros tíos que viven a centos de quilómetros. No traxecto deberán colaborar para enfrontárense a numerosas aventuras, perigos e inclemencias naturais antes de chegar a destino. Conecta en diferentes puntos con Centauros do deserto (1956, John Ford), non só pola escena homenaxe "da porta", senón tamén pola nena salvaxe recuperada, o home solitario con pasado turbio ou o racismo latente. Con todo, en xeral, é un western que non quere ser unha imitación de ningún filme previo. Si conta con lugares comúns e esas chiscadelas fordianas mais, en esencia, hai unha clara pretensión por ser diferente. A trama está ben compensada. Predomina o drama de sentimentos na relación de confianza e amizade que se vai formando entre o vello Hanks e a nena, pero tamén hai unha serie de secuencias de acción e xiros de guión ben distribuídos para manter contentos tanto os amantes do xénero como das historias humanas. Destacan o duelo ao sol no outeiro, resolto dunha maneira bastante orixinal, a escena da vila co cacique e o indulxente desenlace adiantado con esa gran frase: "para avanzar primeiro hai que lembrar". Renxen os efectos visuais. A tormenta de area ou algúns momentos de cando van en carromato son tan pouco críbeis que están a punto de pór en perigo a conclusión do filme se non fose porque a historia é boa e polas grandes interpretacións, tanto de Helena Zengel como de Tom Hanks. A experiencia de Hanks fronte a tremenda expresividade na mirada de Zengel, que foi nomeada a Mellor Actriz Secundaria nos Globos de Ouro. A banda sonora de James Newton Howard tamén foi nomeada aos Globos de Ouro e, case seguro, o será para os Óscars. Un western que non pasará á historia, mais si é un bo bálsamo para amantes dun xénero xa extinto.