Fin do verán con sabor a outono

—Torta de mazá con queixo azul e noces Entra o outono e con el o tempo de mazás, noces e mel. Nesta torta combinanos os sabores da estación máis colorida, un entrante sinxelo e con moito sabor. Ingredientes (6 persoas): 1 lámina de masa follada, 2 mazás, 10 noces, 100 g de queixo azul, mel. Elaboración: Comezamos pelando as noces e reservamos. A continuación lavamos ben as mazás e quitámoslles o corazón, coa axuda dunha mandolina cortámolas en láminas finas. Estendemos a masa follada sobre unha bandexa apta para o forno, dobramos os bordes e picamos no centro cun garfo para evitar que suba. Botamos un pouco de mel sobre a masa e a continuación colocamos as mazás en filas. Botámoslles un chisco de mel tamén por enriba e esfaragullamos o queixo sobre as mazás. Metemos no forno, que previamente quentamos a 200ºC, e deixamos uns 20 minutos, até que a masa estea dourada e o queixo derretido. Nos últimos 5 minutos esparexemos as noces por enriba das mazás e acabamos de cociñar. Agardamos a que arrefríe un pouco e xa podemos gozar desta torta. —Tacos de lacón con pico de galo Os tacos de carnitas son un prato tradicional mexicano que consiste en tortas recheas de carne de porco cociñada a lume lento. Nesta receita imos aproveitar a carne de lacón para preparar tacos cun toque galego. Ingredientes (2 persoas): 500 g de lacón asado, tortas de millo, 1 tomate, 1 aguacate, ½ cebola morada, coandro fresco, 1 lima, jalapeños en conserva. Elaboración: Esta receita é ideal para aproveitar carne que nos sobrou doutras comidas. Imos darlle unha segunda vida mexicana a un lacón asado. Para iso comezamos cortando os anacos de lacón e quentándoo un pouco, a continuación coa axuda de dous garfos desfiamos ben a carne até separala toda. Unha vez preparada, imos facer o mollo, o típico pico de gallo. Cortamos o tomate e a cebola en cadradiños pequenos e mesturamos todo, aderezamos con zume de lima e co coandro picado. Integramos ben todos os ingredientes e reservamos. Por outro lado imos tirar a pel e o óso ao aguacate e esmagámolo ben cun garfo, engadímoslle un chisco de sal, o restante do zume da lima e remexémolo ben. Por último imos quentar as tortas nunha tixola e cando comecen a estar douradiñas retirámolas e xa podemos comezar a montar os tacos. Colocamos primeiro unha camiña de aguacate sobre a torta, a continuación a carne desfiada co mollo propio de asala e rematamos cun pouco de pico de gallo e uns anacos de jalapeños por enriba. Podemos decorar cunhas folliñas de coandro picadas antes de servirmos ou acompañalo con algún mollo picante. —Pudin de pan O pudin de pan é un xeito de aproveitar o pan vello e unha sobremesa ben sinxela. Fíxose famoso en Inglaterra pero agora é coñecido no mundo enteiro. Ingredientes (6 racións): 300 g de pan vello, 1 l de leite, 200 g de azucre branco, 1 limón, 3 ovos, 100 g de pasas. Para o caramelo: 100 g de azucre branco, 70 g de auga. Elaboración: O ingrediente principal desta sobremesa é o pan vello. Comezamos cortandoo en cadradiños e botámolo no vaso dun batedor. Engadímoslle o leite morno e deixámolo abrandar uns 30 minutos máis ou menos. Lavamos o limón, relámoslle a pel e reservamos. Mentres se hidrata o pan imos preparar o caramelo. Para isto botamos nun cazo o azucre e un chorriño de limón, quentamos a fogo medio e remexemos constantemente até que se derreta de todo. Neste momento engadimos auga quente con moito cuidado e seguimos remexendo un pouco até que se incorpore todo. Retiramos do lume e deixamos arrefriar. Cando teñamos o pan xa ben mollado trituramos todo e engadimos o azucre, a reladura do limón e os 3 ovos. Dámoslle outro golpe co batedor para integrar ben todo e xa temos o amoado preparado para o noso pudin. Botamos o caramelo nun molde apto para o forno e esparexémolo polo fondo e as paredes. Logo incorporamos o leite co pan triturado, botámoslles as pasas por enriba e tapámolo cun papel de aluminio. Imos cociñalo ao baño maría, para isto colocamos nunha bandexa con auga, metémolo no forno, que previamente quentamos a 160ºC e deixamos uns 80 minutos á mesma temperatura. Podemos picar cun pau e se sae limpo estará xa preparado. Retiramos do forno e deixamos arrefriar un chisco antes de metelo na neveira, necesitamos agardar unhas 4 horas antes de tirar o molde. Finalmente cun coitelo finiño despegamos os lados e colocamos o molde sobre o prato no que o imos presentar, dámoslle uns golpiños por enriba até que caia e servimos acompañado do caramelo.