BDra Gráfica sacará a banda deseñada á rúa en Pontevedra e homenaxeará Miguelanxo Prado

Pontevedra será a capital da banda deseñada entre o 27 e o 30 de xuño coa chegada da segunda edición de BDra Gráfica, o evento que promove o Concello pontevedrés e O Garaxe Hermético para fomentar a lectura de banda deseñada (BD) na cidade do Lérez. O éxito do ano pasado propiciou a repetición do evento con algúns cambios, o principal nas datas de realización, como explica a Nós Diario o debuxante e responsábel da organización, Kiko da Silva. “Queríamos sacar a BD á rúa e pensamos que marzo, coincidindo co Día do Cómic, non permitía estar fóra polas condicións meteorolóxicas”, sinala, "creo que é necesario sacar a BD á rúa e reivindicar o contacto con autoras e autores", engade . A aposta será grande. Na céntrica praza da Ferrería instalarase unha gran carpa de 30 metros que contará con 24 postos, entre librarías e editoras, cunha singular presenza de fóra. Nese mesmo espazo decorrerán as charlas e as sesións de sinaturas. Ademais, o acontecemento mostrará na propia praza varias exposicións didácticas nas que cada autora e autor explica o seu proceso creativo. Alén diso, haberá tres mostras máis. Unha delas estará situada no Teatro Principal e amosará a totalidade de debuxantes que virán á feira e asinaran a súa obra. O festival BDra reivindica a banda deseñada, unha arte na que Pontevedra "é potencia" Outra lembrará os 45 anos de existencia da editorial catalá La Cúpula. Por último, a terceira homenaxeará durante un mes, na Fundación Manuel Moldes, a Miguelanxo Prado a través dos orixinais de Presas fáciles (El Patito Editorial, 2016). No festival presentaranse, diariamente, catro obras de profesionais noveis e tamén consagrados. Ao evento tamén asistirán Bartolomeu Seguí, que adaptou Malaherba (Salamandra Graphic, 2024), novela de Manuel Jabois e tamén presentará Boomers (Salamandra Graphic, 2023). Entre a selección galega de obras estará a realizada por Andrés Castro (colaborador de Nós Diario e crítico cinematográfico en Sermos Galiza), Ozo Perozo e Alexandre Senande, Sentinelas da lúa carmesí (Editorial Galaxia, 2024).. O evento contará con auténticas figuras desta arte gráfica, como Ana Miralles e Antonio Altarriba, ademais de Bea Lema, autora gañadora do premio Anguleme con O Corpo de Cristo (Deputación da Coruña, 2018), que presentará unha novela gráfica elaborada con bordados; e Carlos Portela e Keko, que darán a coñecer en Pontevedra a súa Contrition (Norma, 2023). Alén de libros de banda deseñada no evento tamén haberá, o domingo, proxeccións de cinema para crianzas e tamén a presentación dun documental. Carlos Portela, guionista de 'Contrition': "A reincidencia dos delincuentes sexuais abre o debate sobre que facer con estas persoas" Miguelanxo Prado O cartel deste ano elaborouno Miguelanxo Prado, autor que será homenaxeado nesta edición despois de facer o propio en 2023 con Ana Miralles. “Cremos que aínda non tivo o recoñecemento que se merece”, asegura Da Silva referíndose ao debuxante galego. O responsábel do festival lembra que o coruñés foi quen de montar no seu día Viñetas desde o Atlántico, “o xermolo de que se creasen moitos colectivos, como BD Banda ou Polaqia, ademais de difundir a revista Golfiño (Edicións Xerais) e comezasen a publicar fóra da Galiza autoras e autores galegos”. Ademais, o debuxante vigués lembra que Prado “foi o creador do Xabarín da CRTVG e gañador de múltiples galardóns como o Premio Nacional do Cómic, entre outros”. IA e futuro da BD Tras o éxito do ano pasado, o festival repite a experiencia de contar cunhas xornadas profesionais que este ano traerán temas como a entrada da Intelixencia (IA) e os dereitos de autor no sector, ademais da saúde entre debuxantes da banda deseñada. "Os autores e autoras fomos os que reaccionamos primeiro ante a chegada da Intelixencia Artificial Xenerativa por estimar que incumpre a lei", considera Da Silva, "e seguen adiante, ningunha empresa podería facer o que están facendo elas", agrega. Mitos e lendas da Galiza ambientan a banda deseñada Ante isto, pon en evidencia que "cada vez se fala máis e é lóxico: vainos afectar a todos, tamén a outras profesionais". Neste sentido, denuncia que "fomos os primeiros en perder emprego" polo que demanda máis "coherencia, por exemplo nos carteis para anunciar eventos municipais ou na ilustración de libros de editoriais e xornais". A chegada da IA non é o único problema para a BD galega. A falta de apoio institucional dificulta o seu avance rápido. O último caso foi a denuncia do propio Da Silva sobre a súa presenza no stand da Xunta da Galiza no Saló del Cómic de Barcelona (Catalunya) . "Estiven no Salón do Cómic de Barcelona, si, mais a viaxe e o hotel pagueimos eu, non a Consellaría de Cultura", asegura.