Belén Puime: "Os personaxes de 'Pringadas' puideron solucionar o básico e agora veremos como van esas vidas"

Cando comezou a pensar nunha segunda tempada para Pringadas? Cando fixen a primeira tempada, antes de que ninguén a vira, para min era como un primeiro proxecto para darme a coñecer e chamar a atención de alguén. Desde o primeiro momento no que a proxectamos comezamos a ter moi boas opinións e vimos que había moito interese. Aí comezamos a loitar por unha segunda tempada. Foron case dous anos, porque agardamos poder estrear os novos capítulos dentro de 2024. Realmente creo que dentro do audiovisual o máis complicado é o feito de atopar un oco. Hai veces nas que a túa serie está ben, mais nese momento ás produtoras ou ás televisións non lles interesa para a estratexia que están seguindo. Tes que estar insistindo moito e agardar a que sexa o momento correcto. E iso foi o que levou máis tempo: confirmáronnos que nos mercaban a segunda tempada a comezos deste ano e a partir de aí xa foi todo rodado, organizando calendarios e escribindo moitos guións. O que aprendemos é que ninguén vai vir, tes que estar chamando para conseguir as cousas. Contando cunha primeira tempada fechada, como viviu esta nova gravación? Foi moi especial. Pasou relativamente pouco tempo entre unha e outra gravación, mais a miña vida mudou bastante. Había unha parte de min que estaba súper contenta, mais tamén tiña unha presión de querer demostrar ese salto profesional que demos, posto que parte do equipo tamén estivo na primeira tempada. Eramos rapazas recentemente graduadas e agora somos persoas con máis experiencia no medio. A pesar disto, paseino moi ben durante a rodaxe e efectivamente si notei unha diferenza comigo mesma. Creo que fun quen de facelo mellor. Como foi o proceso de escribir os novos guións? O maior reto era darlle unha certa continuidade. A primeira tempada está composta por historias que abren e fechan no mesmo capítulo. Non quería contar outra vez tres historias diferentes. Sabía que quería facer algo distinto, mais mantendo a continuidade do que se vira na anterior. As tres protagonistas, Catu, Xoana e Antía, teñen cada unha o seu tema, que xa se ve na primeira tempada: sexualidade, aceptación da propia imaxe e o que se deriva do diagnóstico do virus do papiloma humano. Agora, collemos estes temas e damos un paso máis aló. Xa vimos que os personaxes puideron solucionar o básico e agora queremos ver como continúan esas vidas. Aínda que na vida real pasaran case tres anos, en tempo de ficción ocorre no mesmo ano. Nese sentido tamén tivemos sorte porque as actrices non mudaron moito. De feito foi moi gracioso no caso de Carmela Vázquez, que fai de Xoana, porque cando gravamos a primeira tempada ela estaba entrando na carreira, e agora está en cuarto. Dicímoslle que comezou e rematou a carreira con Pringadas. Hai novos personaxes? Si. Hai catro que collen bastante protagonismo, interpretados por Miguel Canalejo, Suso Cortegoso, Ana Oca e Fernando Rivas. Tamén hai algúns cameos sorpresa que non podo contar, mais que me fai moita ilusión que estean aí. En que punto está a rodaxe? O primeiro episodio xa está entregado á TVG, e o segundo e o terceiro están fechándose. Faltan pequenas cousas de grafismo e de son, polo que en nada xa estarán entregados tamén.