Os cinemas máis arriscados e innovadores cítanse no festival S(8) da Coruña

Cineastas que experimentan con novas linguaxes e producións que son postergadas polos circuítos de distribución comerciais. Filmes dun gran valor cinematográfico pero que son de difícil acceso para o publico. O (S8) Mostra de Cinema Periférico amosa ao público galego un cine renovador, audaz, realizado na maioría dos casos con medios exiguos e que reflicte preocupacións, situacións e conflitos ignorados case sempre polas carteleiras comerciais. Desde o 31 de maio e até o 9 de xuño, o festival da Coruña encherá as pantallas das súas catro sedes -a Domus da Coruña, a Sala Palexco, a Filmoteca da Galiza e a Fundación Luis Seoane- de pura maxia fílmica. E non é esaxerada a referencia á maxia se temos en conta que unha das homenaxes da edición deste ano será a Kenneth Anger, unha das grandes figuras do underground norteamericano que, ademais, era un grande amante do ocultismo. Hai agora un ano que faleceu o autor da escandalosa Hollywood Babylon, e o encontro coruñés quere lembralo proxectando dous dos seus filmes máis emblemáticos: Lucifer Rising (1970-81) e Inauguration of the Pleasure Dome (1954-56). E quizais relacionado con esa dupla natureza do cinema de Anger, o cinema de Morgan Fisher, a cuxo traballo se dedica unha ampla panorámica, pode ser visto como o elo que une a idea hollywoodense das películas e o cinema experimental, grazas a unha serie de obras que esmiuzan con intelixencia e humor as convencións do cinema industrial. 10 anos de esmorga: o filme que marcou a historia do cinema galego Cinema realizado por mulleres A novidade deste ano vén da man dunha nova sección, Sinais Latinoamérica que, encabezada pola primeira retrospectiva que se lle dedica a Narcisa Hirsch despois da súa morte, mostrará exclusivamente obras de mozas creadoras: Marie Louise Alemann, María Rojas, Azucena Losana ou Andrea Novoa entre outras moitas. O certo é que o cinema realizado por mulleres atravesa toda a programación desta 15ª edición do S(8), o que dará pé para coñecer a obra de creadoras tan interesantes como Rhayne Vermette, cineasta métis -un dos tres pobos aborixes recoñecidos no Canadá-, afamada internacionalmente tras o seu paso pola Berlinale e por Toronto coa súa primeira longametraxe, Ste. Anne; a mexicana Annalisa D. Quagliata, que emprega a luz como medio de expresión artística para crear imaxes surrealistas que evocan un forte sentido de suspense e asombro; ou a chilena Franci Durán, cuxo traballo se enraíza na experimentación con soportes fotoquímicos e xira arredor da historia, a memoria e a violencia. Por outra parte, a sección do festival dedicada ao cinema expandido, Desbordamentos, que ten lugar na Fundación Luis Seoane, acolle este ano dous artistas que transitan ese camiño: Gaëlle Rouard, unha das fundadoras do mítico Atelier MTK en Grenoble, da que poderemos ver entre outras, a súa película Darkness, Darkness, Burning Bright que se estreou no Festival de Róterdan e gañou o Premio á Mellor Película Experimental do festival Curtas Vila do Conde, e Lynn Loo, música e cineasta orixinaria de Singapur radicada en Londres, que explora o cinema expandido nun contexto performativo con múltiples proxectores de 16 mm funcionando ao mesmo tempo. E non debemos esquecer a retrospectiva dedicada á histórica Margaret Honda, que inclúe a proxección, por primeira vez no Estado, da xa clásica Spectrum Reverse Spectrum, realizada en 70 mm e que só pode verse no seu formato orixinal. Made in Canadá O cinema realizado no Canadá está sempre no horizonte dos organizadores da Mostra de Cinema Periférico e, este ano, a súa mirada detense na Film Farm, un proxecto fundado en 1994 por Phil Hoffman, -quen estará na cidade da Coruña- que se desenvolve nunha granxa de Ontario, onde cada ano se congrega un grupo de artistas para aprender e compartir técnicas de revelado e manipulación analóxica. Coa desaparición xeneralizada dos laboratorios fotoquímicos e mais o subsecuente auxe da cinematografía dixital, a Film Farm pode situarse como precursora do movemento emerxente de artistas e colectivos comprometidos coa estética e a ética da película feita a man, a realización dun "cinema artesanal" que floreceu a pesar da contemporánea desaparición do cine analóxico a escala industrial. Bruno Arias: "A mocidade non ten detrás grandes produtoras e precisa que se aposte por ela" Ademais, o dinamismo da escena actual de cinema experimental canadense vén da man de the8fest festival dedicado a mostrar exclusivamente cinema feito en súper 8, dirixido agora pola cineasta Robin Riad, que traerá unha selección de pezas da historia do festival. Sinais A sección Sinais distribúese este ano en dúas sesións que son como a cara e a cruz dunha moeda. Nunha delas, a cámara rexistra o real modificándoo a través do encadramento, a montaxe ou outras técnicas de cámara. Na outra, modifícase o real para o rexistrar coa cámara. Obras de Pablo Useros, Rocío Mesa, Pere Ginard, Beatriz Freire ou Valentina Alvarado, entre outras, serán as protagonistas da primeira sesión. Na segunda, poderán verse filmes de Elaine Sier, Esperanza Collado, Juliana Julieta ou o Colectivo Craneal. Cinema experimental da Galiza A nova vangarda galega estará representada dentro da programación na sección Sinais cos traballos de Iago Lourido, que propón unha obra enmarcada en San Sadurniño e na súa experiencia no festival Chanfaina Lab; Yasmina Farhani Luaces, graduada en Belas Artes en Pontevedra que trae a (S8) unha obra nacida do obradoiro impartido por Berio Molina na última edición do festival Novos Cinemas de Pontevedra, ou o vigués Pablo Agma, recente gañador das bolsas ao desenvolvemento ese8_LAB, organizadas polo festival. Belén Puime: "O formato de webserie é moi importante; dá a oportunidade de comezar no audiovisual" Ademais, a obra de María Ruído será a protagonista do programa monográfico en liña Ultreia et suseia, dedicado cada ano ás voces máis destacadas do cinema galego actual (Helena Girón e Samuel Delgado, Carla Andrade, Berio Molina e Alexandre Cancelo, Diana Toucedo...). En total, a programación da mostra cinematográfica (S8) na Coruña contará con 18 pezas de autoría galega. Traballo formativo do S(8) En relación á dimensión formativa e impulsora de creación do (S8), o festival cinematográfico acolle tamén as obras resultantes de BAICC, residencia no LIFT de Toronto que este ano foi desfrutada por Agnès Hayden, e das Bolsas ese8_LAB, grazas á cal a artista peruana afincada en Madrid, Nicole Remy, viaxou ao Nanolab, en Australia. O resultado de ambos os programas poderase ver na sección Desbordamentos deste festival.