Circo, humor e maxia toman as rúas de Vilagarcía

A novena edición do Festaclown en Vilagarcía xa está a punto. O Animaclown, a animación de rúa, comeza hoxe ás once da mañá para dar paso a un programa que dá o pistoletazo de saída mañá con Leo Bassi e que presenta un completo panorama das novas tendencias no novo circo, ademais de ofrecer espectáculos máis ortodoxos que manteñen a calidade e a diversidade. "O noso obxectivo é propoñer un programa que se diferencie das programacións habituais dos concellos", explica Nacho Fungueiriño, coordinador do encontro, en conversa con Nós Diario. "Temos que achegar propostas que vaian sempre un paso máis alá, que dean a coñecer novas tendencias e artistas que alarguen o campo do novo circo, que combinen a atención ás compañías galegas con invitados de fóra, e que estimulen a curiosidade do público e da profesión". Un propósito que, ao tempo, é un reto, xa que o público da vila arousá, que leva anos seguindo o festival, ten un criterio moi formado e é cada vez máis exixente. "Xa hai un tempo que notamos que temos un 'público de festival' que recoñece os códigos, que respecta o traballo dos artistas, que participa sen invadir... Ás veces, no teatro de rúa isto é complicado, pero en Vilagarcía xa se converteu nun reto e nun estímulo para seguir mellorando". O Festaclown encherá Vilagarcía de humor, circo e maxia A cara social do festival Este ano, se cadra, a novidade é unha presenza máis notábel da narración oral, con dúas contadoras d tanto prestixio como Vero Rilo e Ángeles Goás que, ademais, cobren o apartado social, ao que o festival sempre lle outorga unha especial relevancia. "Estabamos tendo algúns problemas para cubrir ese apartado porque moitas das entidades coas que colaboramos fechan en agosto. E a narración oral permítenos atender a eses temas socialmente máis apremantes sen a complicación de forzar esas colaboracións durante o verán", declara Fungueiriño. En todo caso, tamén se manteñen esas complicidades coa gala de 'O novo circo da diversidade', en colaboración coa asociación Con Eles e o grupo de teatro Clámide, ou co Igatuke, unha batukada inclusiva promovida pola función Igualarte. Tamén dentro do apartado social debe incluírse a misa patólica que Leo Bassi oficiará en memoria do clown Jango Edwards, falecido aos 73 anos o sábado 5 de agosto. Edwards participou no Festiclown en varias ocasións e xa fora homenaxeado polo festival. "Era un grande amigo do festival e quixemos facerlle esta última despedida con Leo, que tamén era un amigo seu. Seguro que moitos dos participantes do Festaclown se sumarán: era unha persoa moi querida e un artista descomunal", di o coordinador do evento. O Mago Teto estrea espectáculo de maxia con banda en directo Circo galego Dos 24 espectáculos do programa desta edición do Festaclown, 13 son galegos, algúns deles dunha traxectoria xa histórica como o Titirimundi de Tanxarina. "Sempre intentamos que a participación de compañías galegas sexa maioritaria, e este ano que Tanxarina fai corenta anos, a súa presenza aquí era inescusábel", comenta Fungairiño, quen, ademais, enxalza outros espectáculos como os do Mago Teto -"a súa montaxe Rock &amp; Magic é perfecta para fechar o festival, ten moitísima forza"- ou o de Píscore -"é unha compañía moi demandada polo público do festival, que xa lle outorgou o premio por dúas veces. E creo que Barroco é o mellor espectáculo que fixeron até o de agora". Ademais destas, tamén estarán presentes outras compañías de contrastada calidade como N+1, de Alfredo Pérez Muíño, SU.MA, Sempre Arriba, ou a compañía de animación Troula. Álvaro Reboredo: "O reto actual do circo na Galiza é ter un recambio xeracional de profesionais" Circo de varios continentes na Arousa Para un organizador, sempre é complicado escoller unhas obras por riba doutras, mais Fungairiño decídese a escoller a etíope Kine Circus dentro do programa internacional deste ano. "Había tempo que tiñamos ganas de traer unha compañía de circo africana, mais é complicado, teñen que coincidir moitas circunstancias. Este ano, Kine estaba de xira por Europa e así podemos traer Greed, un espectáculo moi completo, de moita calidade e, ademais, moi innovador". "Por suposto, tamén está Leo Bassi", continúa, "que é o noso gran padriño desde os inicios e que xa é o suficientemente coñecido como para poder dicir algo novo del. O seu espectáculo 70 non é tanto unha retrospectiva como unha celebración de que coa súa idade pode seguir facendo espectáculos que atraen o público. E tamén vén Circo no Ato, unha das grandes compañías do circo do Brasil, que xa estivera hai uns anos connosco, pero que agora traen un espectáculo completamente diferente". Pablo Reboleiro: "Tratamos de facer un traballo diferente" Falta de apoio das Administracións Malia a experiencia e a traxectoria do Festaclown, o apoio das administracións segue estando por debaixo do que podía esperar un encontro que é referencia non só na Galiza, senón en todo o noroeste da península. "A Agadic (Axencia Galega de Industrias Culturais, da Xunta de Galiza) rebaixounos a súa axuda por segundo ano consecutivo. E a Deputación de Pontevedra non axuda a festivais organizados por compañía profesionais, o cal roza o absurdo", láiase Fungairiño. Tanxarina cumpre corenta anos facendo teatro de monicreques na Galiza