Comedia e compromiso social e político na nova edición de Cineuropa

Oactor galego Luís Zahera, o director portugués João Canijo e a actriz madrileña Ana Torrent serán os destinatarios da 37ª edición de Cineuropa, que entre os días 9 e 25 de novembro proxectará 117 películas en diversas salas de Santiago de Compostela. A edición 2023 reivindica o carácter subversivo da comedia desde o filme inaugural, Puan, unha comedia dirixida por Benjamín Naishat e María Alché que gañou a Cuncha de Prata ao mellor guión no festival de Donostia e que retrata con humor a tensión que preside a vida cotiá de Arxentina e que polariza o país desde hai anos. Vilagarcía vibra co cinema fantástico e de terror Comedia e compromiso O ton humorístico da película inaugural esténdese a un ciclo temático que debe o seu título ao filme O mundo está tolo, tolo, tolo de 1963 e que reúne doce das películas de comedia máis singulares da historia do xénero. Ademais do popular filme de Stanley Kramer, inclúe obras de Billy Wilder (Bícame, estúpido, 1964) Preston Sturges (As viaxes de Sullivan, 1941), Nanni Moreti (Vaselina vermella, 1989), Ernst Lubitsch (O diaño dixo non, 1943), Jacques Becker (Antoine et Antoinnette, 1947) ou Mario Monicelli (Rufufú, 1958). Todas elas teñen teñen en común retratar aspectos máis escuros da sociedade en clave de humor. Cineuropa desprega un programa que reúne os que considera os mellores filmes da tempada na contorna europea, con firmas como as de Aki Kaurismaki (con Follas de Outono, gañadora do Festival de Ourense deste ano), Wim Wenders (co seu esperado documental sobre o pintor Anselm Kiefer), Alice Rohrwacher, Ryusuke Hamaguchi, Radu Jude ou Agnieszka Holland. A Palma de Ouro en Cannes, Anatomía dunha caída, de Justine Triet; o premio do xurado en Berlín, Mal viver, de João Canijo; e o León de Prata en Venecia, Eu Capitán, de Matteo Garrone, estarán presentes na Sección Oficial Europea desta edición. O Panorama Internacional escolma boa parte das fitas que transitaron polos festivais internacionais deste ano, e inclúe os premios ao mellor director de Cannes, que recibiu Tranh Ang Hung por A lume manso, ou ao mellor actor no mesmo certame, que recaeu en Koji Yakush por Días perfectos. Tamén abeira a proxección de Aquí, o filme de Bas Devos que resultou gañador do ‘Encontros’ da Berlinale; de O mal non existe, de Ryusuke Hamaguchi, gran premio do xurado da Mostra de Venecia, e de Zona Crítica, de Ali Ahmahzadeh, que gañou o Leopardo de Ouro en Locarno. Outes mostra a cultura marítima desde o cinema Panorama galego O auto das ánimas de Pablo Lago Dantas, eríxese como a primeira película galega en participar na sección Novas/os Cineastas, que exhibirá doce fitas entre as que se atopan as gañadoras da Quincena de Realizadores ou a Semana da Crítica de Cannes, da Berlinale, da Mostra de Venecia ou do Festival de Locarno. E a sección que dá conta do Panorama Audiovisual Galego proxectará cinco longametraxes: Chichi e mais eu, de Nico Campos; Honeymoon, de Enrique Otero; O camiño de Ramón Chao, de Aser Álvarez; Os espazos en branco, de Bruno Arias; e a película de Pablo Lago Dantas. Ademais, presentaranse quince curtas de Ariadna Silva, Anita Pico, Anxos Fazán, Santos Díaz, Ángel Santos, Ana Amado e Lois Patiño, Lucía Estévez, Coral e Laura Piñeiro, Marta Gómez e Paula Iglesias, Ángel Montero e María Serna, Lara Bacelo, Mirian Opazo e Alba Pino. Alfonso Zarauza terá unha sesión para as súas películas Parola de lado e sola e Pontevedra hora cero. Jaione Camborda, a sororidade que fai fronte ao control Cinema e memoria Cineuropa conmemora o centenario do nacemento de Jorge Semprún cunha escolma de proxeccións e dúas actividades paralelas para as que contará coa colaboración do cineasta Costa-Gavras. Unha mesa redonda na que participará o director Costa-Gavras, con quen colaborou, ademais da presenza no programa de dez filmes baseados nos seus guións e a proxección do documental sobre o final do franquismo As dúas memorias, a única que dirixiu, completan a homenaxe. O programa inclúe outros dous ciclos que poñen o foco na construción da memoria a través do cinema. No ano en que se conmemoran 40 anos de democracia na Arxentina, o ciclo 40 D Cinema e democracia afonda na pegada do pasado ditatorial deste país a través de filmes como La historia oficial, de Luís Puenzo ou El juicio, de Ulises de la Orden. Ademais, A 50 anos do Golpe en Chile explora o padecemento do pobo chileno durante a ditadura de Pinochet a través da ollada da cineasta Carmen Castillo, documentalista e guionista chilena, militante do Movemento de Esquerda Revolucionaria que colaborou co goberno de Allende. Tras o golpe de Estado de Pinochet, pasou á clandestinidade canda o seu compañeiro Miguel Enríquez, líder da resistencia chilena, e as fillas dos dous. Mais a policía secreta da ditadura de Pinochet, descubriunos e deulle morte a Enríquez, ao tempo que expulsou a Castillo do país. En Francia, a directora consolidou unha longa traxectoria como cineasta documental. Lois Patiño triunfa na Berlinale con 'Samsara' Presentación en Compostela A concelleira de Capital Cultural, Míriam Louzao, conduciu onte o acto de presentación do Cineuropa 37 na compaña da deputada de Cultura da Deputación da Coruña, Natividade González, e do director do festival José Luis Losa. Louzao salientou "a aposta da edición por reivindicar o potencial revulsivo da comedia e por manter esa fiestra aberta á diversidade de olladas, linguas e culturas, que Cineuropa pon cada ano ao noso dispor".Natividade González aludiu a Cineuropa como unha cita destacada no só para a cidadanía compostelá senón para todas as galegas e galegos". Finalmente, Jose Luís Losa, concluíu a ronda de intervencións destacando o carácter celebratorio e público dos festivais de cinema, nun momento en que parecen en perigo de extinción da man de gobernos reaccionarios: “isto sucede por ese simbolismo poderoso do festival de cinema como ágora democrática. É un acto colectivo, un festival de resistencia fronte a unha guerra cultural que busca privatizar case todo, uniformar e invisibilizar o que o cine singulariza: as emocións, a loita social, as denuncias das violencias estruturais”. As curtas '11.20 A.M.', 'Raticide', 'One Minute' e 'Papirola' triunfan no FIC de Verín