A Deputación de Pontevedra involúcrase no novo filme de Ignacio Vilar
O cineasta Ignacio Vilar vén de recadar o apoio da Deputación de Pontevedra para o seu novo filme, María Solinha 2.0. Así o escenificaron director e altos cargos do ente provincial nun acto celebrado esta sexta feira na sala de prensa do Pazo Provincial.
O proxecto de Vilar transcorre no século XXI, aínda que os paralelismo coa historia de María Solinha, a heroína de Cangas do século XVII, son evidentes. “Entronca coa actual reclamación de dignidade da muller en todos os eidos da sociedade”, indican desde a produtora -Vía Láctea Films-, “e convida á reflexión sobre os desafíos que debe afrontar unha muller no século XXI”.
No acto da Deputación, a presidenta Carmela Silva e mais o deputado de Cultura, Xosé Leal, acompañaron a Vilar, quen explicou que a rodaxe -tamén apoiada polo Concello de Cangas- se desenvolverá en Cangas, Vigo, as Illas Cíes ou Bueu entre outubro e novembro de 2018.
'A que andas?' en Cans
Non foi a única actividade do proxecto María Solinha 2.0. O cineasta, autor da Esmorga ou Vilamor, asistiu á 15ª edición do Festival de Cans e presentou o filme na sección A que andas?, en que autores e autoras expoñen os seus traballos en curso.
Nota: imaxe do acto de presentación de 'María Solinha 2.0' na Deputación de Pontevedra.
María Solinha 2.0 trata da historia dunha moza de Cangas que “soña con ser unha grande actriz” a través dun método intrpetativo revolucionario. “Será quen de acadar o seu obxectivo sen que o prezo social e persoal da súa ousadía lle resulte insoportable?”, pregúntase a sinopse oficial do filme.