O Galo presenta o cómic que dá vida a Seoane
“Seoane. O creador na súa tinta”, de Carlos Taboada e Enrique Mauricio, chega a Compostela da man da Asociación Cultural O Galo a próxima cuarta feira, 26 de xuño, cunha presentación e posterior roteiro.
O libro dá conta dos primeiros anos da vida do polifacético creador e a partir de textos do propio Seoane e de persoas próximas a el, dá vida e fai memoria da súa etapa de estudante en Compostela, das súas influencias, experiencias, primeiros traballos e pensamento até o seu exilio na Arxentina após o golpe de Estado de 1936.
Tomarán a palabra no acto os propios autores, que en 2008 crearon o colectivo “Polo Correo do Vento”, especializado en actividades para o público máis novo co fin de promover a lectura, a comprensión oral e o desenvolvemento da creatividade e expresión artística.