Larraitz Urruzola, directora de Titiriberia: "Sempre buscamos programar espectáculos que se inspiren da tradición do títere popular"

—Cales eran as expectativas á hora de abordar a programación deste ano? A Asociación Morreu o Demo ten como obxectivo fundamental a recuperación do títere popular, que ten similitudes con outras tradicións de toda Europa. É unha tradición antiga que na Galiza se fixo popular a comezos de 1900 coa familia Silvent, que creou o personaxe de Barriga Verde bebendo da tradición europea. A través do noso festival sempre buscamos programar fundamentalmente espectáculos que beban da tradición do títere popular. Se observamos eses antecedentes europeos, vemos que hai certas rutinas que se repiten: sempre hai un personaxe principal que se enfronta a monstros ou ao demo, pasando por unha catarse para superar os seus medos ou as agresións que está recibindo. —Precisamente, un dos puntos fortes desta edición é o convite á República Checa. En que consiste a súa participación? Alí é moi recoñecida a tradición dos títeres, aparece en todas as familias. Co apoio de varias institucións checas, participan dous grandes especialistas, Marie Jirásková e Pavel Jirásek. Traen unha das maiores coleccións privadas da República Checa, títeres antigos que pertenceron a familias con trucaxes de movementos específicos. Para o Titiriberia é un prestixio que esas pezas antigas e a súa historia veñan a Rianxo para o desfrute de todas as persoas que se queiran achegar. É moi interesante ver como para as mesmas necesidades dramáticas de artistas e artesáns xorden solucións diferentes. Ao final, trátase de animar obxectos, darlles vida, e en cada lugar cada artesán inventa as súas maneiras de resolver. Ademais, Jirásková e Jirásek farán un curso para profesionais ou amantes dos títeres para adultos arredor dos teatros de papel, algo moi tradicional na República Checa, e manipulación dos títeres con esas trucaxes que traen para a exposición. E foi un éxito, posto que as prazas para este curso xa están cubertas. Por último, van impartir unha conferencia para mostrar a importancia da tradición titiriteira no seu país e a historia ligada a estas figuras con pequenas pezas audiovisuais que mostren esta realidade. —No programa tamén salienta a Feira Vella. Cal é a motivación deste espazo? Na Asociación Morreu o Demo sempre reflexionamos que o espazo natural da Galiza no que se desenvolvían accións e intervencións dramáticas eran os lugares de ocio daquela: as feiras. Recuperar ese ambiente, como puntos de encontro, de socialización e de intercambio, parecíanos importante. Sobre todo desde a perspectiva de recrear esas pequenas intervencións dramáticas. Non temos cousas á venda, como ocorrería nas feiras, mais si hai o típico cego que conta o seu romance, un par de actuacións de artistas que falan da itinerancia, intervencións con mecanismos kinéticos, teatro en miniatura, unha exposición de fotografías das edicións anteriores e actuacións propiamente ditas... Tamén están programados xogos populares e un retablo para que a rapazada poida xogar aos títeres, así como talleres para crear estas figuras con papel. Por suposto, contamos con Barrigas Verdes tradicionais e con artistas doutras comunidades. De feito, Ostomila Títeres, que vén de Euskal Herria, presentará unha das súas pezas en galego.