Macua, fundador de Acontravento: "Após un ano prolífico, imos co lanzamento das camisolas da selección galega de fútbol gaélico"

Como xurdiu Acontravento? Oficialmente, naceu en xullo de 2019 tras un proceso previo bastante dilatado de concepción de ideas. Eu non tiña formación nin experiencia nos sectores do deseño e da moda, mais si moitas ideas e ganas de velas materializadas, polo que me decidín a lanzar a marca. O proxecto concibino principalmente sobre tres eixos: poder gañarme a vida con el, divulgar e pór en valor a nosa cultura e identidade e contar cunha ferramenta de intervención social para contribuír a mellorar o mundo que me rodea. Cando lancei a marca fíxeno con apenas cinco deseños plasmados en camisolas, sacas e mochilas. Hoxe en día Acontravento ten un catálogo amplo e variado, tanto en deseños como en produtos. A inspiración na Galiza sempre foi o eixo central do proxecto e o paso do tempo permitiume ir definindo mellor o estilo dos deseños e a identidade corporativa da marca. Cal é o seu proceso de creación dos deseños? A nivel creativo non teño un proceso pautado polo que me poña a traballar. As ideas van xurdindo no día a día froito da exposición á realidade na que vivo. Unha idea pode xurdir lendo un libro, escoitando unha canción, participando dunha mobilización ou incluso nunha conversa informal con colegas. Unha vez teño claro o concepto do deseño e os elementos cos que vai contar, hai que estabelecer o estilo e sobre que artigos se quere sacar, non é o mesmo concibir un deseño para plasmalo sobre unha camisola que sobre unha lámina ou un calcetín. Neste punto é importante destacar o traballo con múltiples deseñadores e deseñadoras do país, como Pruden, Breo Alamancos, Tamara Baz ou Miguel Duarte. Por último, tamén é moi importante a dimensión comunicativa e promocional, forma parte igualmente da esencia da idea e do que queres transmitir. Eses eixos sobre os que se asenta o proxecto tamén teñen moito que ver coas colaboracións con estes deseñadores ou a forma de elaborar os produtos. Ser coherente coas miñas ideas e co que promulgo como marca é un dos elementos principais polos que me guío. Se queremos cambiar a realidade é fundamental ser consecuentes co que pensamos; o exemplo que damos é igual de importante que as ideas que transmitimos. Todo o que me é posíbel intento facelo con xente e empresas do país, dentro dunha lóxica autocentrada de economía circular na que todos nos beneficiemos. Ademais teño claro que cantas máis marcas con deseños inspirados na nosa terra haxa, mellor nos vai ir a todas, xa que van contribuír a prestixiar máis o sector e a mellorar a repercusión e importancia económica do mesmo. E o futuro de Acontravento? No punto no que está a marca para min xa é un logro inmenso. Ver deseños teus en contextos moi diferentes por todo o país e poder gañarte a vida cun traballo así é moi gratificante. Igualmente, sempre busco ir aumentando pouco a pouco a oferta. Este ano xa houbo varias novidades e agora mesmo estou cun proxecto que me ilusiona bastante, o lanzamento das novas camisolas da selección galega de fútbol gaélico, as cales anunciaremos nos vindeiros días. Agardo que sexa un ano bastante prolífico e que a futuro haxa moita máis xente que vista roupa inspirada na nosa terra, iso será un bo síntoma para o sector e para o país.