Músicas das dúas beiras do Atlántico resoarán en Compostela da man do 'Maré'

Recuperar a música como ferramenta de expresión cultural, lonxe da mercantilización ou da procura da espectacularidade sen esixencia de contido é a esencia do Maré, o festival de música e artes atlánticas que desde esta cuarta feira e até o vindeiro domingo terá lugar en distintos escenarios de Compostela: Sala Capitol, Teatro Principal, A Casa das Crechas, Sala Riquela e a Praza de Mazarelos. Desde Nordesía, a produtora responsábel do evento, Vítor Belho explica que “a intención é contextualizar o festival dentro desas iniciativas que dan valor social á cultura”. Afástanse así do modelo de macro festivais baseados na contrata das propostas artísticas de máis éxito para garantir un público multitudinario, en consonancia cunha cidade que vén amosando desde hai tempo un rexeitamento ao turismo masivo. Maré será un festival sostíbel, que en lugar de crear macroestruturas “fecundará espazos do mapa da cidade, vindicando lugares como As Crechas”. O festival Maré achega a Compostela as mellores músicas de América Latina Belho cre que “esa visión liberal que converte todo nunha industria, que fai que todo se mida en impacto económico, desnaturaliza a cultura e vaina afastando dese punto contestatario que tiña nos oitenta e nos noventa”. Maré, porén, quere promover “a conexión emocional entre diferentes comunidades artísticas”, pór o foco sobre a diversidade cultural e lingüística, e converterse así nunha “plataforma de intercambio cultural onde artistas de todo o mundo compartan as súas visións creativas e inspiren colaboracións”. Nesa fuxida da mercantilización exacerbada, carecerán de camionetas de food trucks ou camionetas de comida rápida, tan frecuentes neste tipo de eventos. O que se pretende é que o público de Maré consuma nos estabelecementos hostaleiros composteláns e por iso apenas haberá unha barra na praza da Mazarelos na que nin sequera se venderán augas: colocaranse billas de subministro gratuíto para quen desexe bebela, o que cren redundará nunha drástica redución de uso de plástico. A sustentabilidade ambiental non é a única aposta do festival. Tamén avoga por incluír novos talentos ou, dentro dos nomes consagrados, por propostas singulares, como o concerto acústico que dará Sés mañá, a partir das sete, no Teatro Principal, ou a presentación de Basal, o novo traballo de A Pedreira, que terá lugar no mesmo escenario o sábado. Haberá outros nomes do país como Su Garrido, Alana, ou Sumrrá –que actuará esta cuarta feira na Sala Capitol xunto ao artista multidisciplinar Niño de Elche- pero Belho recoñece que a esta altura de ano resulta difícil programar propostas galegas “que xa non viramos en todos lados” e polo tanto cumpran esa máxima de ofertar algo singular. O que, asegura, xurdiu dun xeito moito máis natural foi apostar por propostas femininas, a maioría no cartel: “É o que verdadeiramente nos resulta máis atractivo neste momento”. Entre elas, a tamén galega Azul Ferreira que actuará mañá a partir das nove e media da noite na sala Capitol, como preludio do concerto que o catalán Albert Plá dará acompañado por The Surprise Band. O cartel, explican desde o festival, busca converter Compostela “no epicentro da diversidade cultural e musical de ambas as dúas beiras do Atlántico”. Por iso haberá espazo para a lusofonía, para Latinoamérica, para as linguas cooficiais do Estado, e tamén para algunha “pílula sorpresiva” como os estonios Puuluup, que estarán na praza de Mazarelos. Ese espazo acollerá entre a sexta feira e o sábado os concertos de balde dos vascos Dupla, o trío mediterráneo Marala, o brasileiro Diadorim, os cataláns Delahuerta e Alana. En total, Maré ofrecerá unha trintena de bandas, que se poden consultar na súa totalidade na web www.mare.gal. Ademais haberá actividades pensadas para a cativada dentro do Maré Crianzas, que o sábado presentará “De aquí para alá coas emocións” un proxecto educativo interactivo co que Lydia Botana convida as crianzas a percorrer o mundo a través da música de distintos lugares. Maré tranformará Compostela nun grande escenario para a diversidade culturalf Será no Teatro Principal a partir das 12. Esa mesma xornada, o festival sumarase, con corenta e oito horas de diferenza, á conmemoración do Día Europeo das Linguas a fin de “amosar o seu compromiso coa diversidade lingüística e a multiculturalidade” incluíndo antes de cada actuación unha intervención vindicativa da importancia da variedade idiomática para o ámbito artístico mais tamén para a convivencia e a pluralidade, “dous valores fundamentais que marcan a filosofía de Maré”. Unha novidade desta quinta edición do festival será MATE, o apartado que posibilitará a profesionais do sector celebrar encontros, amosar o seu traballo a través de pequenas actuacións –o que se coñece co anglicismo de showcase- ou de pitching, é dicir de lanzamentos de novas propostas. O Maré ten tamén a intención de utilizar a música para vindicar lugares patrimoniais da cidade. Neste ano, a igrexa da universidade compostelá, que acollerá un evento poético, pero a idea de Nordesía, explica Belho, é ampliar os espazos a utilizar como escenario en vindeiras edicións. Homenaxe ao Zeca no aniversario dos cravos O festival compostelán fecharase o domingo co espectáculo “Lá no xepangara”, unha homenaxe lusófana ao Zeca Afonso creada con motivo do cincuenta aniversario da Revolución dos Cravos e que no Maré contará cunha importante participación galega baixo a dirección artística de Uxía Senlle. Con ela estarán tamén Faia, A Pedreira, o Coro da Rá e o actor Carlos Blanco, que será o responsábel de facer un percorrido pola vinculación do Zeca con Galiza. A proposta pretende “achegar a visión máis africana da música do Zeca, que ao vivir en Mozambique viuse moi influído pola súa cultura”, segundo explica Senlle. Por iso conta, ademais de coa representación portuguesa, con artistas procedentes deste continente. Como novidade respecto ao que vén xirando internacionalmente neste 2024, na clausura do Maré a propia Uxía interpretará unha canción que compuxo ad hoc para o Zeca con motivo da efemérides, e tamén haberá un recordo agarimoso cara ao cantante portugués Fausto Bordalo Gomes, falecido o pasado 1 de xullo. Manuel de Oliveira, Selma Uamusse, Karyna Gomes, Edu Mundo e Fred Martins son algunhas das persoas que participan en “Lá no xepangara”, que dará comezo ás sete e media da tarde no Teatro Principal.