Ouvirmos cumpre vinte anos de mudanzas no sector da cultura galega

Ouvirmos, a empresa de xestión de grandes eventos e grandes infraestruturas culturais, celebra este mes de decembro vinte anos de vida. O que comezou sendo unha casa discográfica reivindica hoxe o seu papel nas mudanzas que experimentou a industria cultural galega ao longo destas dúas últimas décadas co slogan "movendo os marcos da cultura". Neste tempo, o número de empregos do sector chegou a case duplicarse, ao tempo que os libros diminuían o número de títulos publicados e a súa tirada media, e a industria musical abandonaba practicamente a edición física de discos en beneficio da produción dixital. "Estivemos atentos aos cambios do mercado e adaptámonos rápido a cada nova circunstancia: de discográfica pasamos a libros con CD, biografías sonoras, itinerarios histórico-musicais… Detectamos a crise do libro en papel e nos resituamos para xestionar grandes eventos e infraestruturas culturais como o Teatro Colón ou a Cidade da Cultura”, onde coordinan programación e actividades, subliñan. Xosé Aldea, o director e cofundador da empresa, comezou a traballar na produción executiva de espectáculos macro na Feira das mentiras, o festival que Manu Chao levou a Santiago de Compostela no ano 1998. De aí pasou a mergullarse na xestión de proxectos culturais e no 2003 creou Ouvirmos. O legado de Feijoo “resucita” cen anos despois Gravacións históricas Unha das liñas polas que o labor da empresa é lembrado desenvolveuse na colección de gravacións históricas A Tiracolo, que recuperou, restaurou e dixitalizou grandes obras editadas da música galega con anterioridade a 1954. A impresión de 1904 do Coro Aires d’a Terra de Pontevedra -o primeiro rexistro en disco da historia da música no noso país- dirixido polo lendario farmacéutico, gaiteiro e musicólogo Perfecto Feijóo foi unha das xoias recuperadas -coincidindo coa celebración do Ano da Música en Pontevedra- por esta colección. Son dezaoito melodías gravadas por un equipo da Compañía do Gramophone, que viaxou por diversos países europeos efectuando gravacións in situ de grupos musicais locais, no que pode considerarse como o primeiro paso para a promoción e coñecemento popular da, na altura, nova tecnoloxía do disco. Outro dos fitos foi a recuperación da primeira gravación do Himno Galego de Pondal e Pascual Veiga, dentro dun rexistro en discos de dobre pedra do coro Toxos e Froles de 1922. Este tipo de iniciativas valeulle a Ouvirmos o Premio da Crítica de Galiza no ano 2008. Por outro lado, o traballo de edición realizado para os traballos de restauración e divulgación do patrimonio sonoro, como a colección A Tiracolo, as Fotobiografías sonoras ou os Itinerários Historico-musicais permitiron localizar en arquivos públicos e privados centos de fotografías. A creación para o Centro Galego de Artes da Imaxe (CGAI) desta Fototeca Musical durante o ano 2011, enfocada como un arquivo virtual de miles de fotografías relacionadas coa música, facilitou o estudo, a xestión, a catalogación e o acceso a este material, que anteriormente estaba disperso. Máis de 2.000 fotografías foron dixitalizadas e catalogadas durante este proceso. Ouvirmos publica toda a obra poética de Valente en galego Ampliación do campo de traballo "En realidade, fomos superando sucesivas crises", explica Aldea en conversa con Nós Diario. "Primeiro a da industria discográfica, coa perda de valor do disco físico. Logo a do libro, que foi minguando as súas vendas: hoxe resulta moi difícil sacar adiante unha editorial sen un equipo comercial forte. E pouco a pouco transformámonos, primeiro, nunha consultoría cultural, para finalmente dar o paso á xestión destes grandes eventos". Seguindo este razoamento e a base de experiencia adquirida, Ouvirmos foi especializándose na xestión deses eventos que van marcando o calendario cultural, como as mostras arredor de Xela Arias no 2021, ano de homenaxe á escritora no Día das Letras Galegas. A poesía do retrato recompilou os retratos realizados polo fotógrafo Xulio Gil nos anos 80 e 90. Ou as exposicións, o encontro internacional, visitas teatralizadas e estrea de documentais e pezas teatrais deseñados e desenvolvidos por Ouvirmos no 2022 para o Concello da Coruña no centenario do nacemento da actriz coruñesa María Casares, que simboliza o labor de posta ao día de grandes figuras da cultura galega. Traballos realizados coa intención de reforzar o mercado interno e de afianzar os públicos con maior sensibilidade cara á cultura galega. Esa deriva cara á xestión, a facilitar o diálogo coas diferentes administracións pode lerse como un síntoma da dependencia da cultura galega. "Temos unha cultura moi dependente das administracións: Xunta, Deputacións e Concellos son os principais clientes da industria, se é que se lle pode chamar así", concorda Aldea. "Somos un país demograficamente pequeno, pero ademais cunha porcentaxe de público para a cultura crítica moi cativo. E iso condiciona toda a actividade cultural que se dá no país. Se queres profesionalizarte tes que prepararte ben para o diálogo e a negociación coas administracións". Culturgal superou os 10.000 visitantes nunha edición con máis de 200 actividades Desde o Culturgal á Cidade da Cultura Ouvirmos encargouse da coordinación xeral e mais da secretaría técnica do Culturgal, a Feira das Industrias Culturais, un proxecto realizado para a Asociación Cultural Culturgal. Desde Ouvirmos explican que "contribuíron a conceptualizar as edicións da feira entre os anos 2013 e 2021, o que a converteu nun macroevento consolidado que reúne durante tres días a todo o sector da industria cultura galega". Ouvirmos tamén foi a empresa gañadora do concurso público convocado pola Fundación Cidade da Cultura para facerse cargo do servizo de coordinación e programación de actividades culturais da Cidade da Cultura. Desde setembro do 2017 até a actualidade, encárgase da elaboración, redacción e execución de propostas de programas de intervención cultural, artísticos, de creación e innovación, concertos, recitais, actividades museísticas e teatrais... de acordo co calendario e coas directrices sinaladas polo Departamento de Acción Cultural da Fundación. Así mesmo é responsábel da coordinación, seguimento, dinamización e execución dos programas aprobados polo órgano de contratación da Fundación Cidade da Cultura de Galiza, así como da interlocución coa Xerencia e Dirección de Acción Cultural.