Pecha o Charenton, un local cultural autoxestionado de Vigo

Hoxe sorprendía nas redes sociais o anuncio do peche do Charenton, un coñecido local autoxestionado de Vigo. Problemas de queixas dun veciño e visitas continuadas da Policía local obrigáronos a eliminar a programación musical, o que desembocou nunha situación insostible desde o punto de vista económico, tal e como nos contou María, portavoz da asociación que sustenta o local: “A música é imprescindible para nós”. 

Tentaron solucionar a cuestión co Concello pero non foi posible: “Falamos con eles, pero dixéronnos que este tipo de licenzas non as podemos conseguir e dixéronnos, literalmente, "cun veciño deste tipo -mosca cojonera- non podedes continuar adiante”. 

María reitera que o resto dos veciños están encantados co local: “Organizamos máis de 15 actividades ao mes, temos unha biblioteca, hai clases, temos máis de 700 socios e socias en só un ano de actividade. Falamos cos veciños e non teñen ningún problema con nós senon todo o contrario”. 

A idea continúa

Sen embargo, explica, “só pechamos como espazo físico, porque a asociación continúa e intentaremos montalo noutro sitio”. Este abril será un mes de despedida, no que colaborarán músicos e artistas, haberá mercadiños para vender todo o material, mobiliario, etc. 

No seu Facebook explican polo miúdo as razóns e as circunstancias e amplían a reflexión ao resto de Vigo: “A cidade está perdendo sangue (por exemplo o recente peche do Xancarajazz). O estado actual das cousas é dificil en canto a solicitudes, licencias, lexislacións, burocracia, e dificultades que sofren colectivos que deciden desenvolver unha actividade cultural ao marxe da maquinaria institucional. Queríamos ser autosuficientes, dar unha oportunidade en condicións a proxectos peculiares e un uso dun espazo de valor histórico desde e para a xente. Tivemos eventos interesantísimos co local cheo e como non, tamén baleiro”.