Pontevedra exhíbese no Festival de Cine de San Sebastián como sede dos Premios Feroz, que serán presentados por La Dani

A cidade de Pontevedra presentouse este sábado 28 de setembro como a vindeira sede dos Premios Feroz no Festival de Cine de San Sebastián-Donostiako Zinemaldia (Euskadi), un dos eventos máis importantes dentro da cultura cinematográfica internacional. O alcalde da cidade do Lérez, Miguel Anxo Fernández Lores (BNG), acompañado dunha delegación municipal conformada polas edís Anabel Gulías, Eva Vilaverde e Demetrio Gómez; xunto cos voceiros do Partido Popular, Rafa Domínguez, e do PSOE, Iván Pontes; puxo voz a ese feito de relevancia para a cultura pontevedresa. A cidade será sede dos galardóns outorgados pola Asociación de Informadores Cinematográficos de España (AICE) en 2025 e mais na edición de 2026.

“En Pontevedra estamos empeñados en buscar e atopar novos camiños, en ver e aprender todo o que se está facendo no mundo; en estar na vangarda, en facer unha cidade pensada para as persoas. Logralo é un traballo de moitos e moitas, un traballo que brinda oportunidades como a de ser sede dos Premios Feroz por dous anos”, indicou o rexedor. “Os Premios Feroz son un sopro de aire fresco para a nosa programación, e desexo que así o sexamos nós para eles. Queremos ser unha equipa colectiva, onde non quede claro onde empezan os Premios e onde acaba a cidade, e viceversa. A aposta pola cultura ao alcance de todos e todas, e a aposta polo audiovisual son as chaves dunha unión que irá, e xa vai, moito máis alá dunha gala e dunha xornada cunha alfombra vermella”, aseverou.

Durante a presentación, Fernández Lores comentou que “calquera persoa que se achegue a Pontevedra a través dos Premios quedará asombrada. Descubrirá gastronomía, atopará patrimonio, perderase polas súas rúas, comprobará a amabilidade da súa xente e deixarase sorprender cos nosos recunchos e historias. Non repetirá unicamente porque no ano 2026 temos de novo estes premios, repetirá porque quedará namorado desta cidade como eu estou”.

O alcalde agradeceu o traballo de todas as persoas implicadas á hora de sacar adiante a posibilidade de ser sede dos Premios Feroz, “tanto aos traballadores e traballadoras municipais como ás empresas e institucións que se foron sumando unha vez cristalizou esta simbiose”, e agradeceu tamén a presenza do vicepresidente da Deputación de Pontevedra e portavoz do PP na corporación municipal, Rafa Domínguez, así como da do portavoz do PSOE na corporación, Iván Pontes; “feito que fai fincapé e redunda na obrigatoriedade da lealdade institucional e do apoio entre todas as Administracións á hora de sacar adiante citas que transcenden, de xeito evidente, os marcos da Boa Vila”, engadiu.

Ademais, tamén estendeu o agradecemento á Asociación de Informadores Cinematográficos, representada pola xornalista María Guerra, por tomar “a decisión de confiar en nós como cidade e de emprender unha relación que de seguro finalizará coas mellores galas dos Premios ata esta data”.

La Dani presentará a gala

No acto deste sábado decorrido en Donosti tamén se anunciou que a gala dos Premios Feroz de Pontevedra estará presentada por La Dani, que na anterior edición gañou o premio ao mellor actor de reparto pola película ‘Te estoy amando locamente’.

“Sei que todo isto só é unha ilusión e que cando se achegue o momento vou estar con moitos nervios pero serán uns nervios guays. Que tolemia, non? Era dependenta, de súpeto noméanme a un Feroz, gáñoo e ao ano presento a gala… A vida é chulísima”.

“É unha alegría contar coa Dani para presentar a gala dos Feroz”, celebrou María Guerra. “A súa personalidade valente e desprexuizada representa o espírito libre e iconoclasta da nosa asociación”, finalizou.

Previas Feroz en Pontevedra

Durante a súa intervención, María Guerra subliñou que a celebración dos Feroz en Pontevedra vai moito máis alá da gala do 25 de xaneiro: pon o acento no desenvolvemento dunha ampla programación previa que se estenderá desde outubro a xaneiro e que convocará na cidade a algúns dos principais creadores e creadoras do cinema e das series para proxeccións e coloquios. Paula Ortiz, Eduardo Casanova, Lois Patiño e Víctor Iriarte serán protagonistas do mes de outubro e nos próximos días anunciarase a programación de novembro.

Guerra tamén destacou que a AICE acaba de pór en marcha o Programa María Luz Morales: formación práctica e emprego para futuros informadores de cinema e series. Entre os participantes seleccionarase a dous alumnos que obterán un contrato profesional de tres meses nun medio de comunicación. Os docentes serán destacados membros da Asociación e outros comunicadores como Inés Hernand ou Andrea Compton. Terá lugar o próximo mes de novembro no campus Porta de Toledo da Universidade Carlos III de Madrid.

A Asociación de Informadores Cinematográficos de España (AICE) é un grupo plural de máis de 250 xornalistas e críticos que desde 2014 entregan os Premios Feroz para destacar o mellor da produción audiovisual no Estado de cada ano. Ademais dos galardóns anuais, a asociación outorga o Premio Feroz Zinemaldia no Festival de Cine de San Sebastián-Donostiako Zinemaldia, o Premio Feroz Puerta Oscura no Festival de Málaga e o Premio Feroz Cinema Jove á mellor curtametraxe no seo do festival do mesmo nome. A AICE tamén organiza o festival Lo que viene, o campus de cinema e series La Inmortal en Zaragoza e o programa de formación en xornalismo de cinema e series María Luz Morales.

Nese sentido, este sábado desvelouse que ‘Tardes de soledad’, de Albert Serra, gañou o Premio Feroz Zinemaldia 2024 á  mejor película en competición na sección oficial do Festival de Cine de San Sebastián-Donostiako Zinemaldia.