Vinte e cinco anos de monicreques en Redondela

A musa cantou a cólera de Aquiles, fillo da ninfa Tetis e do rei Peleo. O máis célebre de todos os que loitaron na guerra de Troia, na que tivo un papel decisivo, foi obrigado a escoller entre unha vida curta e brillante ou unha existencia longa pero escura: elixiu a primeira. Cos seus cinco metros de altura, Aquiles irromperá na programación do Festival Internacional de Títeres de Redondela que celebra a súa 25ª edición do 13 ao 19 de maio. Aquiles é unha marioneta de máis de 5 metros de alto cunha impresionante posta en escena con efectos pirotécnicos que traerán a Redondela os valencianos La Fam. É só unha das 28 compañías -procedentes de entre outros lugares, Italia, Holanda, Arxentina, Francia ou México- que integran o programa deste ano, repartido como é tradicional, en funcións de sala e de rúa. O director do Festival, Luis Crespo, presentou onte o programa do festival nunha rolda de prensa na que estivo acompañado pola concelleira de Cultura, Rita Pérez, o director da Axencia Galega das Industrias culturais (Agadic) Jacobo Sutil, o Deputado provincial de cultura, Jorge Cubela e a alcaldesa Digna Rivas. Crespo salientou entre as novidades desta edición o feito de que a programación de sala -que arranca na segunda feira co italiano Filippo Marionette "colgando dun fío"- estará centrada até a quinta feira con espectáculos de carácter familiar, mentres que os espectáculos para adolescentes e público adulto se concentrarán na fin de semana. Entre os espectáculos máis rechamantes, poderanse ver en Redondela compañías tan prestixiosas como Lejo, de Holanda, cuxo espectáculo Hands Up! (Mans arriba!) é un auténtico prodixio de imaxinación realizado exclusivamente coas mans das compoñentes do elenco e cuns ollos de madeira. Tangram Kollektiv, de Alemaña, busca formas experimentais e performativas dentro do teatro de títeres, cuestionando a materia e os obxectos. O seu espectáculo A forma das sombras trata da relación e o diálogo entre unha Sombra e o seu Corpo, cuestionando con humor a xerarquía dos seus vínculos. O arxentino Sergio Mercurio, trae a Redondela Viejos, o primeiro espectáculo dunha triloxía dedicada á vellez. A obra combina humor e tenrura para presentar -con indubidábel mestría técnica- unha serie de personaxes en cuxos diálogos que rebordan intelixencia e poesía Pola súa parte, Blancanieves, de La Chana Teatro, premio Max ao Mellor Espectáculo para Público Familiar, reinterpreta o clásico infantil con lámpadas e candelabros, conciliando humor e poesía cun orixinal emprego dos obxectos, que se transforman en personaxes da fábula. O festival Galicreques faise eco do relevo xeracional no teatro de títeres Teatro de rúa Mais un dos sinais de identidade do festival de Redondela é a "ocupación" da vila por parte dunha cidadanía con fame de espectáculos feitos a pé de rúa. A oferta neste campo multiplícase e fai difícil escoller, mais alá do colosal Aquiles, que xa se albisca como unha das sensacións do encontro. Nas rúas de Redondela estarán compañías ben coñecidas polas persoas amantes do xénero, como El Espejo Negro, que representarán La cabra, unha recreación dos coñecidos espectáculos ambulantes que teñen ese animal como protagonista. Ou o clásico portugués Dom Roberto, de Rui Sousa, un habitual do festival. Ou os mexicanos do Grupo Saltimbanqui, cuxos Cuentos de México narran diferentes historias a través de distintas técnicas de manipulación: títeres de dedo, de luva, a man como corpo do monicreque, bonecos de vara... Todo, ademais, acompañado de abundantes cancións, corridos e romances mexicanos que desembocan en historias de amor. E, por suposto, unha importante presenza de compañías galegas -desde as máis novas até as máis experimentadas- que mostrarán o estado en que se atopa o teatro de monicreques no país: Títeres Alakrán, que porá en escena O xigante Barriga Verde; Viravolta Títeres, que representará Todos ao balcón!; Mircromina Títeres, coas súas Cousas da casa; ou Trécola Producións, que visitan Redondela Coa música a outra parte. Titiriberia recupera "o feito cultural europeo por excelencia" Escenarios alternativos Ademais dos escenarios habituais, nesta edición instalarase o teatro portátil dos franceses de Théâtre Jaleo ao lado do palco da música, onde interpretarán Edén’ unha peza de 60 minutos que mestura cabaré, nove títeres e os sete pecados capitais. E tamén os galegos de Teatro Ó Cubo escenificarán na Praza do Concello o seu espectáculo De Vilatriste a Vilalegre, unha montaxe desenvolvida nun peculiar escenario con rodas chamado A Utópica Rodante. Neste capítulo tamén se pode incluír A feira dos imposíbeis, dos aragoneses Civi-Civiac unha instalación interactiva onde se mestura ilusionismo, maxia e teatro e que está composta por 25 elementos entre dispositivos de enxeño, caixas misteriosas, calidoscopios, cadros de dobre visión ou espellos surrealistas. E Kinétiko, de Xirapaus, unha instalación de autómatas con personaxes musicais que a partir de elaborados mecanismos crean sons e ritmos. Monicreques na alfombra vermella Clásicos do festival Ademais, o festival, no seu compromiso coa creación de públicos, presenta unha variada programación escolar en numerosos centros da vila. Tamén, o exitoso mercadiño titiriteiro. E, finalmente, a tradicional ruada, a un desfile de monstros que percorrerá as rúas da vila por fóra do espazo habitual do festival e que contará, este ano, coa colaboración de Antía Migueroa, Marcial I. Amoedo, MG Producciones, Barafunda e Troula Teatro. Xusto o momento en que a cidadanía pasa de ser espectadora a ser a protagonista dun festival que xa hai un cuarto de século que lle pertence.