Xa sabes que espectáculo de contos queres escoitar no Sete Falares?

Os contos para adultos recuperan vida estes días na cidade de Pontevedra a través do festival de narración oral Sete Falares. Nesta 12º edición, a cita continúa apostando por achegar espectáculos de profesionais recoñecidos neste eido xunto a figuras menos coñecidas. O calendario de actuacións comezou este domingo, coa inauguración a cargo de Celso Fernández Sanmartín, Quico Cadaval e Guti co seu espectáculo Tres vellas na romaría ao que lle seguiu, esta segunda feira, a galega Atenea García. A clausura deixa a tradicional xornada de domingo para pasar a ser en sábado (8 de xuño) por coincidir, esta edición, coas eleccións europeas. Importante presenza galega e portuguesa Unha das responsábeis da organización é Tareixa Alonso, do colectivo Pavís Pavós. Xunto a Xacobe Rodríguez é a encargada de deseñar, desde 2012, o programa deste festival. Na súa preparación, asegura a Nós Diario, considera importante “ter unha boa parte dos nomes que sexan da Galiza e da lusofonía”. Neste último caso contan coa intervención o 8 de xuño de Dois dos montes (Parador de Turismo, 18 horas) dúo portugués formado por Vítor Fernandes e Estefânia Surreira. “Para esta ocasión tiñamos xa programado para que estivese con nós unha contadora brasileira mais tivo que desistir a última hora polas graves inundacións que decorreron na zona onde vivía”, afirma Alonso, “tiña tamén familia e considerou que o seu lugar era quedarse alí”, engade. A parte galega, ademais da xa citada polo día da inauguración, hai que sumarlle a presenza de xente nova no eido da narración oral. É o caso de Atenea García, que actuou esta segunda feira nas Ruínas de San Domingos, e do cangués Dani Blanco, que actuará hoxe no mesmo espazo ás 20 horas. O Sete Falares volverá encher Pontevedra de historias "Quixemos seguir o mesmo guión que outros anos e ter en conta a experiencia de cada participante", sinala Alonso. Por este motivo a partir da cuarta feira 5 de xuño a programación acelérase. Ese día será a quenda de Cándido Pazó (Teatro Principal, 20 horas) e seguirá na sexta feira 7 de xuño co contador canario Ernesto Abad (Centro de Interpretación das Torres Arcebispais, 18 horas) para rematar co contador arxentino, residente en Lisboa (Portugal), Rodolfo Castro (Parador de Turismo, Casa do Barón, 13 horas). Propostas propias do festival pontevedrés Na organización, como novidade, decidiron recuperar o espazo do Teatro Principal. "É un lugar marabilloso, cunha acústica perfecta ademais de ter unha forma máis acolledora para contar historias", admite Tareixa Alonso, "ademais volvemos ás ruínas de San Domingos e o CITA que estivo fechado", engade. Unha das particularidades deste festival de narración oral é a de crear espectáculos propios a partir de propor dúos e tríos entre contadoras e contadores. Neste edición, este formato decorrerá a quinta feira 6 de xuño (Teatro Principal, 20 horas) coa participación de Vítor Fernandes, Estefânia Surreira e Rodolfo Castro por unha parte, para seguir con Ernesto Abad e Cándido Pazó, pola outra. Malia parecer que non todo o mundo querería actuar ao mesmo tempo enriba dun escenario -moitas veces sen coñecerse- desde a organización aclaran que o que acontece é todo o contrario. "Sempre nos pareceu unha boa idea e funcionounos moi ben, mesmo entre contadoras e contadores que non se viran antes", asegura, "e mesmo dá pé a situacións moi interesantes, froito da improvisación que ten lugar cando estás con alguén que non sabes como reacciona nas interaccións", agrega. Ademais, neste formato, en opinión de Alonso, "o público aprecia de perto diferentes maneiras, algunhas moi diferentes entre si". Paula Carballeira lerá o manifesto do Día Internacional da Narración Oral Outro dos formatos propios que se consolidou neste festival é a Rota de historias que está programada para a sexta feira 7 de xuño, en catro quendas, nas que poderán participar outros tantos grupos de 60 persoas. "Trátase de percorrer a cidade visitando lugares emblemáticos mentres escoitamos historias", indica Alonso, "e nesta ocasión contamos con Xacobo Rodríguez, Rodolfo Castro, Cris de Caldas, Vítor Fernandes e Estefânia Surreira, Ernesto Abad e Cándido Pazó". A saída será desde o Teatro Principal e a organización asegura que o percorrido será "unha sorpresa". A gala de clausura será o sábado (Teatro Principal, 21 horas) e nela compartiran escenario os contos de Cris de Caldas, Dois dos Montes, Rodolfo Castro, Ernesto Abad e Cándido Pazó. Conto infantil e de adultos "Os contos para adultos van por bo camiño", asegura Tareixa Alonso. Baséase en que da necesidade de ter eventos para ese público naceron moitos proxectos que colaboran entre si. A membro de Pavís Pavós pon como exemplo o colectivo de Narración Oral Galega (Noga), no que tamén participan. "Só polo feito de exista unha asociación galega de narradoras e narradores xa é importante, alén de que haxa outras no Estado", sinala. Porén, non todo é positivo na situación actual da narración oral galega se se toca o panorama infantil. "Observamos que as familias agora deixan de levar as crianzas aos espectáculos de contos demasiado cedo, ás veces mesmo con sete anos", asegura esta contadora, "unha mágoa pois é xusto o momento en que teñen idade para entender os contos e tamén os seus personaxes", remata por considerar Tareixa Alonso. O festival Sete Falares leva a antiga igrexa de Santa Clara a narración oral O público réndese ante Quico Cadaval, Celso Fernández Sanmartín e Guti A inauguración este domingo da 12ª edición do festival de narración oral Sete Falares de Pontevedra estivo marcada pola volta ao Teatro Principal de tres grandes contadores da escena galega actual: Celso Fernández Sanmartín, Quico Cadaval e Guti. Co cheo asegurado antes de comezar, puxeron en escena Tres vellas na romaría, un espectáculo de dúas horas que se estreou o pasado mes de outubro dentro da XXIV Rúa dos Contos, o ciclo de narración oral pioneiro na Galiza dentro do Festival Internacional Outono de Teatro (FIOT). Os seus contos conseguiron, desde o inicio, as palmas do público, algo que xa se repite nas súas representacións. "Contaban contos e cantos por quendas, ademais de interactuar entre eles en varios momentos", explica Tareixa Alonso a Nós Diario. A membro do colectivo de contadoras Pavís Pavós, organizador deste encontro pontevedrés, recoñece que o público que asistiu tivo a oportunidade de rir durante toda a actuación. Unha situación que non se dá en todas as ocasións cando se está diante dun espectáculo para adultos "Non sempre hai que rir cando se vai a unha sesión de contos, é algo que moita xente entende que ten que ser así e non está no certo", asegura, "máis neste caso a gargallada estaba máis que xustificada", engade. Os contos, para esta profesional da narración oral, "son como a vida e hai veces que estamos nunha nube ou moi ben e outras todo o contrario". Por este motivo cre que continúan con éxito os contos tradicionais "de toda a vida" que falan "a través dos sentimentos" xunto con outros que son de creación.