Adrián Ben, fóra das semifinais do 800

Non puido ser. Adrián Ben non estará finalmente na semifinal desta sexta feira (11.30h) do 800m masculino. Escapoulle o billete directo na primeira rolda eliminatoria nos últimos metros e acabou cuarto, e volveulle escapar na repesca.

Esta quinta feira o atleta de Viveiro acabou cruzando a meta na súa manga en segunda posición, só superado polo mexicano Jesús Tonatiu López, que lle sacou apenas 24 centésimas. Dado que só o primeiro de cada serie da repesca tiña garantido o billete tivo que agardar ao resto de series, pois tamén pasaban os dous mellores tempos totais.

E Adrián Ben (1:45.37) foi o máis rápido de todos os corredores que non quedaron primeiros nas tres primeiras mangas, pero na cuarta até seis atletas pararon o crono con tempos inferiores ao seu, polo que finalmente ficou fóra da semifinal.