O Aldebarán depende dos apoios económicos para ascender á Superliga de vólei

O Aldebarán-Intasa de San Sadurniño (Ferrolterra) vén de lograr praza para xogar a tempada vindeira na Superliga masculina de vólei. O segundo lugar na categoría estatal de prata deste deporte, un meritorio posto tras o Instercap Asisa Tarragona SPSP, concédelle esta oportunidade, mais a actual directiva estuda aceptala ou continuar na actual por non contar, polo menos até agora, con apoios públicos e privados como para levala adiante con garantías. Partindo da base O Aldebarán naceu pola necesidade de dar continuidade ao voleibol nos anos 80 no municipio de San Sadurniño, un dos deportes máis practicados daquela. O ex xogador e presidente do club desde 2020, Uxío García, relata a Nós Diario que a entrada deste deporte no municipio “ten nome e apelidos”. Foi coa chegada a finais dos anos 70 do mestre Manuel Seco que se introduciron varios deportes. “Meteu o vólei, un deporte que practicara mentres estudaba maxisterio en Lugo, e tamén o atletismo”, lembra García, “era unha persoa excepcional para captar deportistas”, engade. Na tempada 1991-1992, tras xogar un campionato galego infantil, un grupo de docentes, xunto a nais e pais, decidiu darlle continuidade co apoio dunha entidade deportiva. “O colexio destacara e mesmo puxera en problemas o Club Vigo, o que conseguira máis éxitos neses anos”, apunta o presidente. San Sadurniño decide a fase de ascenso á Superliga Masculina 2 de voleibol Polo equipo pasaron moitos adestradores, mesmo de países como Rusia ou Ucraína, que asentaron o traballo de base. A xeración de Uxío García, que agora conta con 35 anos, foi a máis prolífica en títulos, unha realidade que partiu desde a canteira. “Gañamos case todos os campionatos galegos, de alevíns até xuvenís, e chegamos a Sénior en 2010 para gañar a Primeira Autonómica (cuarta a nivel estatal) e dous anos despois, na fase final en San Sadurniño, gañamos o título de Primeira División”, recorda García. Co ascenso no peto chegaron á Superliga 2 na que estiveron varios anos. Nesa categoría xa se decataron dos problemas que existían para equipos humildes como o Aldebarán e, aínda así, gañaron o título nas tempadas 2017-2018 e 2020-2021. O presidente do club explica que o peor eran os desprazamentos, como os que realizaron a Cáceres (Estremadura), Castelló (País Valencià) ou Melilla, que tiñan que realizar en coche e sen contar con hoteis. Esa circunstancia non a tiveron cando acolleron na casa a Copa do Príncipe en 2016 que acabou nas vitrinas do club e con Anxo García como balón de ouro. “Foi un momento que marcou e rematou por ser o que somos, un equipo que gañou dúas copas Príncipe, dúas ligas e un subcampionato esta mesma fin de semana”, indica García. Mala estrea do Zalaeta na Copa Princesa de Voleibol O problema económico dun equipo “ascensor” “Cando se ascende de categoría hai que manterse e na Superliga é moi difícil”, asegura o presidente da entidade, “para a Superliga 2 temos un moi bo nivel, mais é insuficiente para manternos na Superliga, somos un equipo ascensor”, engade. Uxío García tense reunido en numerosas ocasións con responsábeis de varias Administracións, desde a Xunta da Galiza até a Deputación da Coruña, para que valoraran os éxitos deportivos e o significativo que é contar cun equipo galego de voleibol nas máximas categorías a nivel estatal. “Non se trata da mesma maneira ao vólei que a outros deportes que están en categorías inferiores”, asegura García, “ademais de constatar que teñen máis axudas as entidades con sede nas cidades que as que estamos en municipios pequenos”, conclúe. Un exemplo víveo coa Secretaría Xeral para o Deporte da Xunta da Galiza. "Os equipos de fútbol nas últimas categorías reciben o dobre de axudas que as que recibimos nós cando estamos na elite do noso deporte", afirma o presidente do equipo de voleibol de San Sadurniño. No caso dos patrocinios privados, Uxío García é consciente de que apostan polos deportes que saen máis nos medios de comunicación. "Nese eido, ademais, temos o problema de que non nos seguen", asegura, "no caso da final que disputamos esta pasada fin de semana tivemos que ser nós os que gravaramos as imaxes para envialas á TVG", aclara. Galiza torna no corazón do voleibol estatal A importancia do ascenso Desde o Concello agardan que o club poida xogar finalmente na Superliga. En declaracións a Nós Diario, o seu alcalde, Secundino García, indica que é “unha honra ter un equipo punteiro nunha disciplina de equipo, olímpica e con moitas fichas federadas en todo no mundo”. Entre os datos que dá é que San Sadurniño "é o concello máis pequeno en habitantes que ten un equipo competindo en categorías de ámbito estatal en calquera disciplina deportiva". Recoñece que o seu municipio "é importante polo turismo deportivo de todo o Estado español que achega cada quince días para seguir aos seus equipos". Porén, admite as dificultades que ten o Aldebarán "que está a xogar moi ben coa canteira, unha maioría galega, mais precisa recursos económicos para os desprazamentos".