Calendario frenético para o BM O Porriño na súa semana de 'Erasmus': "Será unha proba de madurez"

O BM O Porriño comeza unha semana histórica na que se estreará en competición europea. A primeira parada será esta terza feira ás 20.30 horas en Logroño, onde as xogadoras porriñesas visitarán o Sporting La Rioja, que até o momento sao puido sumar un punto en Liga, cun balance de dúas derrotas e un empate. As galegas chegan a este encontro xusto coa tendencia inversa: dúas vitorias e un empate para sumar 5 puntos que as colocan terceiras na táboa clasificatoria. O conxunto porriñés viaxa esta mesma mañá ben cedo para “poder chegar e adestrar na Rioxa antes de xogar o partido desta mesma tarde”, explica Ismael Martínez, adestrador do BM O Porriño, para Nós Diario. Sen descanso, mañá o equipo volve facer as maletas para retornar á casa. Martínez quere facer dous adestramentos previos ao partido da Copa Europea da EHF que terán esta mesma sexta feira ante o Brixen italiano. “O debut en Europa é ilusionante para o club, para as xogadoras… e, por suposto, para todos”, explica o adestrador porriñés. Atlético Guardés e BM O Porriño comezan unha nova tempada apuntando alto: así afrontan o curso Esta primeira eliminatoria do torneo continental decidirase a dous partidos. Ambos os encontros disputaranse no Pavillaon Municipal do Porriño (comarca de Vigo), polo que o conxunto galego terá ao seu favor o factor campo, contando coa afección para poder gañar a un conxunto moi potente. As entradas levan á venda desde a fin de semana a un prezo de 10,36 euros para un partido e 15,54 euros para os dous. As persoas socias non precisan mercala e poden acceder directamente ao recinto. Brixen, o equipo punteiro dunha pequena vila italiana As xogadoras do conxunto italiano chegan a este encontro despois de gañar todos os partidos de Liga que disputaron no que vai de tempada. Comezan de novo o ano cun enorme nivel que xa amosaron a pasada campaña, cando se proclamaron campioas de Italia. O xogo do Brixen baseáse no contragolpe, apoiándose en xogadoras de enorme calidade como son Giada Babbo, Giovanna Lucarini ou Francesca Luchin, ás que as porriñesas non poderán quitar o ollo de enriba. A equipa do Porriño estréase en Europa contra o Brixen italiano. O Brixen é o equipo da localidade de Bressanone —topónimo en italiano— ou Brixen —en alemán; palabra de orixe celta—, na provincia de Bolzano, que forma parte da rexión autónoma de Trentino-Alto Adige, situada na Italia nororiental e limitando ao norte e leste con Austria. Por iso mesmo, na rexión a meirande parte da poboación non é italianoparlante (27%), senón que a lingua de uso maioritario é o alemán (72%), e conta tamén cunha lingua retorromance propia desta rexión e do Veneto falada por tan só 1% da poboación, o ladino. Bressanone, localidade duns 22.000 habitantes, ten un dos equipos de balonmán feminino máis potentes do país e mesmo do continente e chega en moi boa forma ao Porriño. Dous equipos de pequenas vilas que acoden a esta cita europea con moita gana de amosar que son merecedoras de estar aí e loitar por algo grande. Tres partidos en seis días O calendario do BM O Porriño porá a proba a condición física das xogadoras. “É o prezo que temos que pagar por querer loitar en todas as competicións”, asume Ismael Martínez. A pasada fin de semana non houbo competición de Liga debido aos compromisos internacionais das seleccións, mais varias das integrantes da escuadra porriñesa non puideron descansar, pois responderon á chamada dos seus respectivos combinados estatais. Aitana Santomé (lateral esquerda), Paulina Buforn (extremo dereita) e Maider Barros (extremo dereita) foron convocadas pola selección do Estado español, e as arxentinas Caro Bono (central), Micaela Cassasola (lateral) e Aye Rosalez (porteira), concentráronse tamén coas súas compatriotas. Santomé, Buforn e Barros desprazáronse a Logroño sen pasar polo Porriño para o partido desta tarde. Begoña Fernández: "O que conta dos Xogos é abrir esa porta para as máis novas" “Temos tantos compromisos esta semana que decidimos que viaxasen directamente á Rioxa e non que tivesen que vir primeiro aquí, para que non tivesen que facer unha viaxe máis”, explica o adestrador. As xogadoras arxentinas tamén chegarán á capital rioxana sen previo paso polo Porriño, pero nesta mesma terza feira. “Debido aos compromisos internacionais, estes días só puidemos adestrar coas oito xogadoras que nos quedaban”, lamenta Martínez. Aínda así, a ilusión por disputar a competición europea pode con todas as dificultades. O equipo do Porriño xa se clasificara para Europa en tempadas anteriores, pero as elevadas exixencias económicas para poder participar impediron que finalmente puidese cumprir o soño europeo da afección do club do val da Louriña. Este ano as porriñesas por fin poderán gozar do balonmán do máis alto nivel europeo no Pavillón Municipal, un reto que ilusiona a todo o municipio. "Esta dura semana será unha proba de madurez para o equipo", afirma Ismael Martínez. Deste modo, Ismael Martínez e as súas xogadoras estarán, esta tempada, en tres competicións por vez primeira. “Isto vai ser unha proba de madurez para as xogadoras. Vai ser unha semana moi dura. Sabemos que estar en tres competicións ten estas cousas e, ademais, se tes xogadoras de nivel que son chamadas polas súas seleccións, tamén sabes que as vas perder semanas enteiras, como foi esta”, comenta, esperanzado malia as présas derivadas da exixencia do calendario. O Guardés quere manter o liderado ante o Rocasa canario As xogadoras do Atlético Guardés e mais a súa adestradora, Ana Seabra, terán até o vindeiro sábado para preparar o seu encontro nas Illas Canarias ante o Rocasa. O equipo do Baixo Miño chega ao encontro como líder da Liga, empatado a puntos co Málaga pero cunha diferencia favorábel de goles que situa as galegas no máis alto da táboa. O seu rival desta xornada, o Rocasa, chega tras comezar a competición cunha derrota e dous empates, polo que buscará mellorar a súa xeira na casa gañando ás líderes. A pasada campaña o equipo guardés gañou os dous encontros ante as canarias. Porén, o partido disputado en territorio insular estivo moi axustado. Unha boa primeira parte das xogadoras do Rocasa obrigou as guardesas a remontar o partido para rematar gañando finalmente cun 27-28 no luminoso ao seu favor. No cadro das canarias destaca a brasileira Ana Paula Rodrigues Belo, xogadora experimentada e campioa do mundo coa súa selección. No seu palmarés conta cos títulos da Liga de Campións europea, que gañou co CSM Bucuresti romanés en 2016, e da Copa Europea da EHF, que conquistou co Rostov-Don ruso no curso seguinte, o 2016-17.