O Celta reforza a súa zona defensiva coa incorporación do central sueco Carl Starfelt
"Ola, son Carl, estou en Vigo, ala Celta!". Son as primeiras declaracións como celtista da última sinatura do novo proxecto comandado por Rafa Benítez, o sueco Carl Starfelt.
Defensa central nado en Estocolmo en 1995, deu os primeiros pasos da súa carreira no seu país natal, onde tras militar en conxuntos como Brommapojkarna e Göteborg deu o salto ao Rubin Kazan ruso en 2019, onde permaneceu até a súa fichaxe, a cambio de catro millóns de libras, polo histórico Celtic de Glasgow en 2021, club do que chega á escuadra olívica.
Durante as súas dúas tempadas nos Hoops disputou un total de 7.501 minutos distribuídos en 87 partidos, contribuíndo fundamentalmente a que os seus se proclamasen campións da liga escocesa e da Copa da Liga en 2022, así como da Copa de Escocia a pasada tempada 2022/23.
As súas actuacións elevárono a ser considerado como un dos mellores defensas do campionato, sendo o número un tanto en roubos de balón como en interceptacións, así como nos duelos por pelotas aéreas.
A súa chegada a Vigo, por unha cantidade que ningunha das dúas entidades implicadas no traspaso confirmaron até o de agora, responde a razóns que van máis aló do eido estritamente deportivo, tal e como sinalou o seu preparador até o de agora, Brendan Rodgers.
O técnico recoñeceu que, alén "da superioridade deportiva e económica do campionato español" sobre o escocés, detrás da partida do sueco estaba a "relación" sentimental que mantén coa futbolista Jacynta Galabadaarachchi, quen até este verán compartía escudo con Carl Starfelt no Celtic e que recentemente asinou polo Sporting de Lisboa. E, para non estar separados por 3.000 quilómetros, senón unicamente polos 400 que hai entre Vigo e a capital portuguesa, abandonou un club no que exhibiu o mellor rendemento da súa traxectoria deportiva.
A festa do polbo trae consigo un Lugo-Arenteiro
Sen saír do fútbol, pero cambiando a Primeira División pola primeira Federación, dous dos catro representantes galegos na categoría de bronce, Arenteiro e Lugo, disputan hoxe o Trofeo Festa do Polbo, no marco do evento homónimo que estes días revoluciona a vida no Carballiño.
O balón comezará a rodar sobre o céspede do campo de Espiñedo a partir das 19.30 horas, nun choque pactado desde a fichaxe por parte do conxunto albivermello a tempada pasada -cando aínda militaba na Segunda- do adestrador do Arenteiro, Fran Justo. Alí, ambos os contendentes depurarán estratexias e afinarán a súa posta a punta de cara ao próximo inicio da competición oficial.