Conta atrás para o inicio dunha tempada de fútbol gaélico que ilusiona

O fútbol gaélico galego xa ten data para ver de novo o balón sobre o verde. Na primeira fin de semana de outubro, a Asociación Galega de Fútbol Gaélico (AGFG) organiza un torneo amigábel para que os xogadores e xogadoras dos distintos clubs poidan comezar a ter minutos. “Buscamos tamén que a xente nova que nunca xogou ao fútbol gaélico ou que está comezando pase os seus primeiros minutos de xogo nun partido, que lle colla o gusto”, comenta María Benavides, responsábel do Comité de Competición e secretaria da AGFG, para Nós Diario. A intención da AGFG é organizar o torneo no Barbanza “para así seguir sumando xogadores de gaélico nesa zona”, explica Benavides. O prazo para participaren está aberto e calquera equipo pode anotarse. Para o comezo das ligas, tanto masculina como feminina, aínda haberá que agardar un chisco máis. As inscricións continúan abertas para os clubs que queiran inserirse na competición. A día de hoxe, os que xa confirmaron a súa participación son, na liga feminina, Auriense Campus da Auga (Ourense), Turonia (Gondomar, comarca de Vigo), Lavandeiras de San Simón (Vigo), Estrela Vermelha (Santiago), Fillas de Breogán (A Coruña) e Grovias (A Guarda, Baixo Miño). A estes conxuntos é posíbel que se sume este ano para competir un equipo feminino do Lorchos FG, club de Boiro (O Barbanza) que xa tiña representación na competición masculina. Por outra parte, a liga masculina conta xa con nove equipos inscritos: Fillos de Breogán (A Coruña), Estrela Vermelha e mais o seu filial Estrela Gaels (Santiago), Lorchos FG (Boiro), Keltoi e o seu filial Estibadores (Vigo), Turonia (Gondomar), Auriense Campus da Auga (Ourense) e Lume de Beltane (Poio, comarca de Pontevedra). Non se descarta a participación dalgún outro conxunto, xa que o período para inscribirse e participar na liga organizada pola AGFG segue aberto. Ambas as competicións comezarán en outubro. Primeiro chegará a quenda da liga masculina, que dará o disparo de saída na segunda fin de semana de outubro. A liga feminina terá que agardar até a última fin de semana de outubro para botar o balón a rodar. A defensa dos títulos Na competición feminina, o Auriense levou a pasada campaña tanto o campionato de liga como o All Galicia, un torneo de repescas e fases finais a catro. María Benavides, que ademais de membro da AGFG foi xogadora da Irmandiña no Europeo de 2022 organizado en Pontevedra e campioa da categoría ‘Intermediate’, é tamén a porteira das vixentes bicampioas a nivel de clubs, as ‘aurienses’. “Esta tempada non só buscamos obxectivos a nivel título, senón despregar un xogo de maior calidade. Iso só o imos conseguir con traballo e logrando facer nos encontros o que adestramos”, comenta Santiago Devesa, adestrador do Auriense. Pola súa parte, as compostelás do Estrela Vermelha tentarán defender o título de Copa que colleitaron a pasada campaña. No eido masculino, o gran rival a bater é o Fillos de Breogán. Os xogadores da cidade herculina fixéronse co triplete gañando Liga, Copa e All Galicia. Nesta tempada tentarán manter o dominio absoluto nas tres competicións. En liga, a pasada campaña gañaron todos os partidos que xogaron. As Gaélico-Escolas As Gaélico-Escolas, un proxecto posto en marcha hai dous anos, conta co apoio de distintos patrocinadores e institucións. “O ano pasado foi moi bo. Contamos coa participación de centros escolares e máis de 800 rapaces e rapazas asistiron aos torneos que organizamos e aproximadamente uns 2.500 estudantes recibiron unha unidade didáctica de fútbol gaélico”, explica a Nós Diario Alexandre Sanmartín 'Jano', coordinador das Gaélico-Escolas e adestrador da selección galega de fútbol gaélico. As unidades didácticas de fútbol gaélico consisten en catro sesións que se imparten nos centros educativos dentro das aulas de educación física. “Os resultados son moi positivos. Estamos falando dun deporte minoritario que estamos a conseguir que se introduza no país. Contar con máis de 800 rapaces e rapazas participando nos torneos e xogando gaélico é para nós un éxito”, comenta Jano. O ano pasado dende a AGFG organizaron oito torneos —seis deles de carácter comarcal, outro a nivel galego e tamén a competición europea que decorreu en Vigo. “As previsións que temos para este ano son dun incremento de 25% do número de xogadores e xogadoras deste deporte na Galiza, xa que contamos con manter ou mesmo subir en moitos puntos do país, e este ano imos incorporar novos concellos”, explica o técnico. A AGFG conta xa con sete novos centros que queren participar na iniciativa das Gaélico-Escolas. Deste modo, serían perto de 30 centros escolares os participantes nesta actividade que, ademais, organizará torneos comarcais e mais o torneo galego. Ademais, o gañador desta competición participaría na europea, da que polo momento non se coñece sede pero “previsibelmente será nalgún punto de Europa Central” que “podería ser na zona do Benelux”, augura. A selección galega volta aos torneos internacionais Á selección galega agárdanlle tres eventos no 2025. O primeiro chegará en marzo, coa participación tanto da selección masculina como da feminina no Torneo Internacional da Haia (Países Baixos), no que participan uns 25 equipos chegados desde diferentes países. A selección galega participa desde hai dúas tempadas e o ano pasado tanto a selección masculina como a feminina chegaron á final. “Queremos volver a este torneo internacional. É unha oportunidade de coller bagaxe de cara a prepararnos para os torneos europeos e mundiais”, valora o adestrador compostelán. Tamén en marzo a selección participará na Celtic Cup, organizada pola propia AGFG na Galiza. “Aínda estamos traballando nela, pero previsibelmente será o sábado 8 de marzo”, adianta Jano. Participarán unha ducia de equipos chegados desde Irlanda e Gran Bretaña e, de novo, terán participación os combinados galegos. Xa en xuño terán lugar os Xogos Europeos nos que Galiza, coa súa representación feminina, resultara gañadora hai dúas edicións. A masculina non quedara atrás, clasificando para a final. “Non esquecemos tampouco que no horizonte temos os Mundiais de 2026 en Irlanda”, comenta Jano, coa vista posta en volver pór na mellor posición posíbel as seleccións galegas dentro do panorama do fútbol gaélico internacional.