A Copa Galega de Sup Race decidirase este sábado en augas de Sanxenxo

Este sábado as augas de Sanxenxo, no Salnés, serán decisivas para definir a clasificación final da Copa Galega de Sup Race. A quinta proba desta competición comezará ás 8 horas coa entrega de dorsais. A primeira quenda que se botará ao mar será ás 10 horas e nela participarán as categorías Sub-8, Sub-10 e Sub-12. A partir das 11 horas será o momento da Sub-14 e tamén dunha ruta popular non competitiva que procurará dar a coñecer esta disciplina deportiva ao gran público. As categorías Sub-18, Elite, Kahuna, Master e Gran kahuna sairán ás 12 horas. Rematarán a xornada coa participación de Sub-16 e amateur cinco minutos despois. Desde o Sanxenxo Paddle Surf Club, entidade organizadora do evento deportivo, o coordinador da canteira e responsábel da proba, Ángel Moldes, considera, en declaracións a Nós Diario, que realizar esta competición é “un chanzo importante para nós e para este disciplina na localidade” por definir “os campións e as campioas deste tempada en cada categoría”. O feche das inscricións está sinalado para hoxe ás 23.59 horas. Onte xa contaban cunha listaxe de 70 deportistas e desde a organización agardan con chegar ás 90, unha cifra que se considera “habitual” neste tipo de probas. O parasurf monta a grande onda da vida en Valdoviño Para esta proba final, todas as olladas estarán postas na categoría elite. Nela a disputa do título desta tempada decidirase entre Nicolas Barreiro Brun (Waira Club Galego de Surf) e Iván Puente Rodríguez (SUP Mera). Por parte das mulleres, a loita sería entre as deportistas Ana Marte Pérez (SUP Mera) e Gadea Ibarloza Arrizabalaga (Club Castro Urdiales). Percorridos O percorrido das diferentes categorías comezará na praia de Silgar, nunha liña de saída marcada na area. Momentos antes cada participante contará coa información que precisa para realizar a proba, como no caso dos xiros que deben ter en conta en cada boia. As categorías Elite, Kahuna e Master terán que desprazarse 12,5 km cunha navegación libre de 8 km até a praia de Paxariñas e voltar para realizar un porte (correr coa táboa na man pola area) en Silgar e dar outra volta. O resto de categorías contarán coas seguintes distancias: Sub-8 (500 metros); Sub-10 (1.800 metros); Sub-14 e popular (3.000 metros); e Sub-16 coa Gran kahuna (1.000 metros). O Campionato Ibérico inunda de windsurf a ría de Vigo Fomentar o paddle surf “A nosa idea é fomentar este deporte entre as nenas e os nenos polo que propoñemos moitas actividades”, explica Moldes. Comezan como un xogo mais desde o club teñen claro que, se lles gusta, “o paso seguinte é a fidelidade a esta disciplina que chega cos adestramentos para ir a competicións”. No caso do Sanxenxo, a entidade está enfocada no circuíto galego a través desta Copa Galiza mais apunta que “queremos sacar canteira cun nivel abondo como para competir a nivel estatal”. Neste sentido, Moldes sinala que xa contan con deportistas que, após un primeiro ano en competición, “entran en podios e, mesmo chegar a gañar competicións como é o caso da categoría Sup-10”. O auxe do paddle surf O paddle surf ten cada vez máis practicantes na Galiza, unha situación que constatan desde Sanxenxo. “Comezou a ser popular a nivel estatal na zona do Mediterráneo en 2008 e xa desde 2010 tivo representación galega”, asegura Moldes. A súa importancia veu acompañada de polémica pola disputa que tiveron no seu momento as federacións de surf e piragüismo por ver en cal delas tería o seu oco. Neste caso, desde a segunda xa se anunciara a intención de realizar campionatos oficiais desta especialidade deportiva. A situación chegou aos tribunais e tivo que ser o Comité Galego de Xustiza deportiva quen fallara, en 2017, a favor da Federación Galega de Surf. Moldes ten claro que a Galiza conseguiu en poucos anos ser unha potencia na zona do Atlántico e o Cantábrico. "Estamos moi por riba a nivel deportivo que Asturias, Cantabria e Euskadi", indica, "ademais consolidamos o circuíto galego", engade. O éxito nesta disciplina débese ao esforzo e traballo de catro clubs. Ademais do de Sanxenxo, lideran esta boa situación no país o Club Galego de Surf, SUP Mera e Imua Paddle Surf. O Surf sopra 35 candeas en Valdoviño "Agora mesmo temos funcionando a Copa Galega de Sup Race con cinco probas, mais os clubs pensamos en ter unha reunión en breve para valorar como foi e, se cadra, realizar algúns cambios", considera Moldes. Para este responsábel do club do Salnés unha das posibilidades de mudanza a incorporar podería ser a inclusión dun gran patrocinio común para toda a competición e poder incorporar algunha proba máis. "Agora mesmo son moi poucas para unhas rapazas e uns rapaces que adestran todo o ano con seis meses sen un obxectivo próximo" polo que sería mellor "un calendario máis extenso e comezar a falar dunha copa de velocidade en mar tendo en conta o sistema que estamos empregando na actualidade", considera o responsábel da organización da Sanxenxo Sup Fest.